Dómssátt í máli Sr. Skírnis gegn kirkjunni og biskupi: „Biskup virðist hafa tekið geðþóttaákvörðun“

Dómssátt hefur verið und­ir­rituð í máli Séra Skírnis Garð­ars­sonar gegn Þjóð­kirkj­unni, bisk­ups­stofu og Agnesi M Sig­urð­ar­dóttur bisk­upi.

Um dóms­sátt­ina ríkir trún­aður og mun Séra Skírnir því ekki tjá sig um hana en hann er að sögn ánægður með mála­lyktir. Hann vill koma á fram­færi hrósi til lög­manns síns, Sigurðar Kára Krist­jáns­sonar, fyrir fag­mennsku hans í vinnu við málið.

„Svo virð­ist sem máls­að­ilar, og þá sér­stak­lega lög­maður bisk­ups, Gestur Jónsson, hafi und­ir­ritað dóms­sátt­ina til að forða Agnesi bisk­upi frá að verða dæmd í hér­aðs­dómi, en sá kostur hefði verið alger hneisa fyrir hana,“ segir í til­kynn­ingu frá Séra Skírni Garð­ars­syni.

Í til­kynn­ing­unni segir enn­fremur:

„Nokkuð ljóst er að sá gjörn­ingur bisk­ups að úti­loka Sr. Skírni frá prests­þjón­ustu, vegna ummæla hans við blaða­mann á Vísir.is, vegna máls sem Skírnir taldi eiga erindi til almenn­ings, var alger­lega út í hött og kallar nið­ur­staða máls­ins næsta aug­ljós­lega á að biskup íhugi stöðu sína sem æðsti yfir­maður kirkj­unnar.

Fyrir þessu eru ýmsar ástæður. Biskup virð­ist hafa van­virt tján­ing­ar­frelsið, horft fram­hjá stjórn­sýslu­lögum og tekið geð­þótta­á­kvörðun. Slíkt er ekki í lagi.

Ekki er vitað hver aðil­anna (þjóð­kirkjan, bisk­ups­stofa eða Agnes sjálf) ber kostn­að­inn að dóms­sátt­inni, þá úrskurð­aði dóm­ari að stefndu (Agnes, bisk­ups­stofa og kirkjan), skyldu bera máls­kostn­að­inn, bæði stefndu og stefn­anda. Ljóst er að þetta allt saman hefur kostað kirkj­una mikla pen­inga, sem betur hefðu verið not­aðir í annað“.

Í sam­tali við Mannlíf ítrekar Séra Skírnir að hann sé ánægður með dóms­sátt­ina og muni ekki tjá sig um hana efn­is­lega. „Hins vegar get ég sagt að sím­tölum linnir varla frá kol­legum, sem velta vöngum yfir áfram­hald­andi setu Agnesar á bisk­ups­stóli.“

„Það er mér óvið­kom­andi, því ég er kom­inn á eft­ir­laun, og mun ekk­ert blanda mér í þá umræðu, þó ég skilji margt áður en skellur í tönnum,“ segir Séra Skírnir við blaða­mann Mannlífs.

Mál bakvarðarins

Málið sem vísað er til að hafi valdið úti­lokun Séra Skírnis frá prests­þjón­ustu, á sér nokkurn aðdrag­anda. Þegar Séra Skírnir starf­aði sem sókn­ar­prestur í Lága­fells­kirkju var brot­ist inn í tölvu­póst hans af full­trúa Þjóð­kirkj­unnar. Í fram­hald­inu var hann sak­aður um brot á trún­aði við sókn­ar­barn sem leitað hafði eftir aðstoð hjá honum. Sókn­ar­barnið átti síðar eftir að verða þekkt sem bak­vörður á Bol­ung­ar­vík á fyrstu stigum Covid-19 far­ald­urs­ins.

Eftir þetta var Séra Skírnir hrak­inn úr starfi sínu í Lága­fells­sókn og gerður að hér­aðs­presti á Suð­ur­landi. Hann hefur meðal ann­ars sakað Agnesi M. Sig­urð­ar­dóttur biskup um ein­elti í þessu sam­hengi.

Fyrr­nefndur bak­vörður komst í fréttir í upp­hafi Covid-19 far­ald­urs­ins. Konan var þá sökuð um að hafa farið til Bol­ung­ar­víkur sem bak­vörður á fölskum for­sendum. Séra Skírnir sá sjón­varps­frétt þar sem hann sá kon­unni bregða fyrir í því starfi sem hún hafði tekið að sér. Hann sagði í fram­hald­inu frá þessu í við­tali við Vísi og var í fram­hald­inu rek­inn úr starfi sínu sem prestur í annað sinn.

„Ég get þó sagt að ég undr­ast að biskup skuli ekki víkja úr starfi á meðan þessi mála­rekstur stendur. Það hefði verið heið­ar­leg­ast,“ sagði Séra Skírnir þegar mála­ferlin voru að fara af stað á sínum tíma árið 2021.