Sigmundur Davíð tjáir sig um fjárkúgunina: „Það er annars eðlis þegar fjölskyldan blandast í málið“

Þann 28. maí 2015 fékk þáver­andi for­sæt­is­ráð­herra, Sig­mundur Davíð Gunn­laugs­son, hót­un­ar­bréf. Þar var hann kraf­inn um átta millj­ónir króna, ann­ars yrðu meintar upp­lýs­ingar um teng­ingar hans við DV.

Sig­mundur Davíð tjáði sig í fyrsta skipti um málið í hlað­varps­þætt­inum Eftirmál með þeim Þórhildi Þorkels og Nadine Yaghi. Sig­mundur Davíð sagði þar frá því að hót­un­ar­bréfið hafi borist á þrjá staði, heim til hans, á leik­skóla þriggja ára dóttur hans og heim til aðstoð­ar­manns hans.

Þegar málið var í umfjöllun hjá fjöl­miðlum kom aldrei fram að hót­anir hafi beinst að dóttur Sig­mundar. „Það er ann­ars eðlis þegar fjöl­skyldan bland­ast í málið,“ sagði Sig­mundur í hlað­varp­inu.

Lög­reglan tók málið strax föstum tökum, sér­sveitin var fengin til að fela sig og bíða þess að ger­end­urnir létu sjá sig á ónefndum stað á Suð­ur­nesjum, þar sem Sig­mundur átti að afhenda pen­ing­inn.

Við hand­tök­una kom í ljós að þarna voru á ferð­inni syst­urnar Hlín Ein­ars­dóttir og Malín Brand. Hlín var í miklum fjár­hags­vanda á þessum tíma og veik á geði.

„Hlín hringdi í mig að kvöldi 28. maí og sagð­ist hafa sent bréfið og nú þyrfti að ná í pen­ing­ana. „Sendirðu bréfið og held­urðu virki­lega að það hafi kom­ist til skila og það verði tekið mark á þessu rugli,“ spurði ég hana. Ljóst var að hún var búin að fylgj­ast með högum for­sæt­is­ráð­herra því hún sagð­ist vita á hvaða leik­skóla barn þeirra hjóna væri og hafði velt fyrir sér hvort hún ætti að lauma bréf­inu í tösku barns­ins. Hún var aug­ljós­lega veik en ég brást henni og sjálfri mér þá sem fyrr með því að stoppa hana ekki af. Hún sagði að ég yrði að koma með henni á afhend­ing­ar­stað­inn, ofan Hafn­ar­fjarðar. Ég neit­aði í fyrstu en hún nauð­aði í mér áfram. Ég hugs­aði með mér að eina leiðin til að þessu linnti væri að ég færi með henni. Það yrði frið­þæg­ing og hún losn­aði við þetta mál af heil­anum. Mér leið eins og ég væri að fara með lítið barn til að athuga hvort jóla­sveinn­inn væri í fjall­inu. Hlín hafði und­ir­búið þetta vand­lega. Hún sagð­ist hafa lesið sér til um fjár­kúg­anir á vefnum. Við mæltum okkur mót morg­un­inn eftir,“ sagði Malín Brand í við­tali við Stundina í nóv­em­ber árið 2015.

Hér­aðs­dómur dæmdi báðar syst­urnar 12 mán­aða fang­elsi fyrir fjár­kúg­un­ina.