Mannlíf birti á dögunum skjáskot af verkefnalista sem ætlaður var ,,au pair’’ á Íslandi. Listinn vakti hörð viðbrögð en sýndi hann dæmi um reglur og verkefni sem au pair hérlends hefur þurft að fylgja. Verkefni og vinnutími sem komu fram á listanum eru á skjön við þær reglur sem gilda hér á landi en var au pair gert að vinna ellefu og hálfan tíma á sólarhring.
Vert er að taka fram að samkvæmt reglum á vef Útlendingastofnunnar má vinnutími au pair vera að hámarki 30 tímar á viku eða 5 tímar á dag.
Samkvæmt heimildum Mannlífs hefur vistfjölskyldan verið í veitinga- og verslunarrekstri síðast liðin ár og eru tveir veitingastaðanna töluvert þekktir. Þá hefur fólk ítrekað kallað eftir nafngreiningu þar sem það vilji forðast viðskipti við fyrirtækin. Mannlíf hafði samband við móðurina innan vistfjölskyldunnar. Sagði hún að um misskilning væri að ræða og að hún væri í raun fórnarlambið í aðstæðunum.
„Ég er fórnarlambið, eftir að au pair fór, ég og börnin mín!“
Bauðst hún til þess að senda blaðamanni gögn til þess að sanna að um misskilning væri að ræða, enn hafa engin gögn borist. Þá hefur konan hvorki svarað skilaboðum, né síma þrátt fyrir ítrekaðar tilraunir blaðamanns að ná aftur af henni tali.
Athugasemdir