Ritstjóri Wikileaks, Kristinn Hrafnsson skrifaði í morgun eiturharða færslu á Facebook þar sem hann talar um Jóa og baunagrasið í raunheimi.
„Ef ég væri eins og Sif Sigmarsdóttir, besti pistlahöfundur landsins, myndi ég skrifa um Jóa og baunagrasið.
Jói var kjáni sem lét plata sig til að selja mjólkurkú heimilisins fyrir þrjár baunir. Þar endar viðskiptasagan í raunheimi,“ segir Kristinn í byrjun færslunnar.
Því næst talar hann um sölu Íslandsbanka:
„Innan við fjórðungur þjóðarinnar vildi selja Íslandsbanka. Meirihluti þjóðarinnar var því algerlega andvígur. Mamma Jóa skildi að það var bara alls ekki góður díll að fá 100 milljarða fyrir banka sem skilaði á síðustu sjö árum 103,6 milljörðum í hreinan hagnað.
Þegar búið er að plata fólk þarf að búa til ævintýrasögu um baunagras til himna og endalausa auðlegð.“
Niðurlagið hjá Kristni er sterkt:
„Í raunheimi misstu Jói og mamma hans litlu íbúðina sína á Seltjarnarnesi, voru hrakin úr sveitarfélaginu og búa núna í félagslegu húsnæði í Reykjavík.
Sá sem blekkti Jóa skrifaði ævintýrið því þannig getur hann aftur platað kjána eins og Jóa og farið hlægjandi alla leið í bankann ….sinn.“
Viðbrögðin við færslu Kristins stóðu ekki á sér en þegar þetta er ritað hafa 195 líkað við færsluna og 16 deilt henni.
Athugasemdir