Sá orðrómur gengur nú fjöllunum hærra að almenningur ætti að halda sig heima um næstu helgi og forðast djamm í miðbænum. Téður orðrómur snýst um það að um helgina megi búast við hefnaraðgerðum vegna hnífaárásarinnar á Bankastræti Club.
Líkt og hefur komið fram þá snerist sú árás að nokkru leyti um deilu tveggja dyravarða-fylkinga í miðbænum. Orðrómurinn sem fer nú eins og eldur í sinu snýst um að um helgina þá verði árásarinnar hefnt með því að ráðast á dyraverði og almenna borgara sem séu staddir á þeim veitingastöðum þar sem þeir eru að sinna dyragæslu.
Í skilaboðum sem sem dreifast nú þvers og kruss um internetið eru þrír staðir orðaðir við árás: Auto, Bankastræti Club og Lúx. Dyravarsla á þessum þremur stöðum er sögð vera á vegum sömu dyravörsluþjónustunnar, sem sé svo í eigu nafngreinds manns, sem fjölmiðlar hafa ítrekað fjallað um áður.
Orðrómurinn er orðaður svo í skilaboðum sem dreifast nú í allar áttir um internetið: „Þeir ætla að mæta 50-100 gæjar á nokkrum bílum og rusha dyraverðina og þeim sem að verða í þeirra vegi á Auto, Bankastræti og Lúx. Mælt er með að fólki haldi sig frá bænum og í raun bara að staðirnir opni ekki um helgina.“
Athugasemdir