Einar Þorsteinsson, formaður borgarráðs, vill að Reykjavíkurborg fjárfesti í snjóruðningstækjum því efla þurfi viðbragð borgarinnar til muna þegar kemur að snjómokstri. Snjóruðningstæki og verktakar á vegum borgarinnar hafa haft í nægu að snúast við að hreinsa stofnæðar undanfarna daga og margir íbúar á höfuðborgarsvæðinu hafa verið innlyksa í húsum sínum vegna ófærðar.
„Mér finnst koma vel til greina að Reykjavíkurborg kaupi snjóruðningstæki sem geta sinnt húsagötum samhliða því að verktakar sinni snjómokstri á stofnbrautum og tengivegum inn í hverfin. Viðbragðið við þessu áhlaupi hefur verið í samræmi við þann viðbúnað sem er til staðar. Það hafa verið á bilinu 9-21 tæki að moka götur og stíga frá því á föstudagskvöld. Efri byggðir hafa verið í forgangi en mér finnst vont að sjá fólk enn fast inni í götum sínum á þriðja degi,“ segir Einar.
Egill Helgason fjölmiðlamaður varar við brjálæðislegri hálku á götum bæjarins, en eins og hverjum manni er kunnugt kyngdi niður snjó á höfuðborgarsvæðinu um helgina. „Það er brjálæðislega hált á götum bæjarins. Snjóbræðslukerfið í Miðbænum hefur ekki undan svo það er mannskaðafæri. Verður að gera eitthvað í þessu fljótt. Borgin þarf að gera eitthvað í þessu og eigendur verslana og veitingahúsa líka. Leiðinlegt að brotna i jólatíðinni,“ segir Egill.
Athugasemdir