Brynjar Níelsson, varaþingmaður Sjálfstæðisflokksins, segir Gísla Marteini til syndanna á Facebook. Hann nefnir að vísu Gísla aldrei á nafn en óhætt er að segja að Brynjar sé að svara boðskapi þáttastjórnandans um bíllausan lífstíl. Gísli sagði í gær lítið mál að lifa án bíls ef fólk forgangsraðar.
Sjá einnig: Gísli Marteinn segir þvælu að fólk þurfi að eiga bíl: „Þetta snýst allt um forgangsröðun“
Brynjar segir þetta í raun sjónarmið elítumanns. „Fræga fólkið, sem býr miðsvæðis í borginni með alla þjónustu í kringum sig og þarf aldrei að fara lengra en upp í Efstaleiti, agnúast stöðugt úti einkabílinn. Það er orðið svo viðkvæmt að það nær ekki andanum ef bíll keyrir framhjá eða einhver leysir vind nálægt því,“ segir Brynjar.
Varaþingmaðurinn gengur svo enn lengra og segir einkabílinn frelsara alþýðunnar. „Fræga fólkið er auðvitað upptekið af sjálfu sér og kemur því reglulega á framfæri að það sé gáfaðra, frjálslyndara og meira frelsisþenkjandi en aðrir þegar það gerir hlé á því að tala illa um aðra og hlæja að því um leið, helst í beinni útsendingu. En fræga fólkið veit ekki að einkabíllinn er mesta frelsismál alþýðu manna frá upphafi. Alveg eins og niðurgreiddur leikskóli var í raun mesta jafnréttismál allra tíma. En hvað varðar það um annað fólk?“
Athugasemdir