Vígðir þjónar sem og leikmenn Þjóðkirkjunnar tókust á um fyrirkomulag biskupskjörs á aukakirkjuþingi sem haldið var á föstudaginn.
Það er Heimildin sem greindi fyrst frá.
Aðeins er liðið eitt ár síðan nýjar reglur um kjör til biskups voru samþykktar á kirkjuþingi.
Margt gerðist á þessu kirkjuþingi og meðal annars steig Óskar Magnússon, leikmaður úr Suðurprófastsdæmi, í pontu. Óskar þessi hefur átt í deilum við biskup, Agnesi M. Sigurðardóttur.
„Þeir koma hér upp hver á fætur öðrum og lýsa því að þeir séu manna best færir til að ákveða hver sé biskup, af því að þeir séu prestar. Þeir eru líka hæfastir til að gera ýmislegt annað, eins og við þekkjum. Hér eru formenn eiginlega allra nefnda prestar. Það er fínt. Við erum í góðum höndum. Allra fastanefnda nema í fjárhagsnefnd þar sem Guðni er varaformaður.
Meira að segja í framkvæmdanefnd er prestur.
Ég veit ekki af hverju við ættum að hafa einhverjar áhyggjur af starfinu hér. Auðvitað vita prestar þetta allt saman best, bæði um fjárhagsmál, löggjafanefndarmál, allsherjarmál, öll mál, og að sjálfsögðu öll framkvæmdamál.
Ekki vitum við neitt um þau, ekki neitt um rekstur, lögfræðingarnir, menn sem hafa unnið við það í tuttugu, þrjátíu ár. Það eru bara prestar sem vita það,“ sagði Óskar sem er lögfræðingur.
„Ég held að það mætti kannski skoða að biskup væri alls ekki prestur. Það má ekki horfa á alla hluti frá sjónarhóli presta. Þið verðið að sætta ykkur við það.“
Sagði að endingu:
„Ég vil gjarnan njóta alltumlykjandi hlýju og kærleika ykkar sem hér eruð og læra af ykkur um allt sem mér hefur ekki tekist að læra um ævina og er þess vegna dálítið þakklátur fyrir að hafa setið hér í um tvo tíma og notið þessarar leiðsagnar áfram. Ég held að það mætti kannski skoða að biskup væri alls ekki prestur. Mér hefur helst dottið í hug að hann væri lögfræðingur.“
Athugasemdir