Albert býr á tveimur stöðum – „Best finnst mér að gefa gjafir sem eyðast“

Mat­gæð­ing­ur­inn, Albert Eiríks­son, er neyt­andi vik­unnar að þess sinni. Hann býr ásamt manni sínum Bergþóri Pálssyni á tveimur stöðum. Annars vegar á Ísafirði þar sem hann er aðstoð­ar­skóla­stjóri í Tón­list­ar­skóla Ísa­fjarða og hins vegar í Reykja­vík þar sem hann heldur veislur heima hjá sér og tekur á móti fólki. Það hentar honum vel að flakka á milli staða. Einnig heldur hann úti  upp­skrifta- og upp­lýs­inga­vefnum  Albert eldar

Hvernig sparar þú í matarinnkaupum?

Ég hef verið að nýta mér tölu­vert til­boð í mat­vöru­búðum á seinni árum. Ég fer vel með hrá­efni frekar en að leggja ofurá­herslu á sparnað. Nýti alla afganga vel og frysti. Einnig vil ég hafa mat­inn eins hreinan og mögu­legt er og forð­ast unnar vörur. En ég passa ég líka upp á lifa og njóta því það það sem gefur líf­inu gildi.

Hvað hefur þú í huga þegar þú kaupir mat, fatnað og gjafir?

Ég kaupi mér ekki oft föt. En vil hafa þau vönduð þegar ég geri það og alls ekki „einnota “ en auð­vitað kaupir maður sér eina og eina sum­ar­skyrtu svona með.  Ég missi mig alls ekki á útsölum, kannski af því að mér finnst ekk­ert gaman að fara í fata­búðir. Það er vanda­samt að velja gjafir og þarf að hugsa það vel. Ég vel síður eitt­hvað sem fer upp í hillu eða vegg hjá fólki nema þá í sam­ráði við maka. Best finnst mér að gefa gjafir sem eyð­ast. Hvort sem það er eitt­hvað mat­ar­kyns eða út að borða. Vín­flaska er líka klass­ísk gjöf en hentar ekki fyrir alla. Ég met það í hvert og eitt skipti og vanda mig.

Hverju átt þú erfiðast með að draga úr kaupum á?

Ég man nú ekki eftir neinu sér­stöku en ef ég er erlendis finnst mér mjög gaman að fara einu sinni fínt út að borða eða fara í afternoon tea  sem mér finnst alveg dásam­lega skemmti­legt. En þetta er alveg spari, þá klæðum við okkur upp og förum fínt út.

Skiptir umhverfisvernd þig máli? Endurnýtir þú?

Já heil­miklu. Ég reyni að henda eins litlu og ég get. Er svona miðl­ungs í að end­ur­nýta en hef tekið mig heil­mikið á og get auð­vitað gert miklu betur eins og flestir.  Hef kom­ist að því að flokkun er ekki eins mikið mál og ég hélt í upp­hafi. Byrjaði smátt og hef síðan haldið áfram að bæta mig.

Einnig erum við í moltu­gerð, tökum allan líf­rænan úrgang og búum til mold. Þetta er svona fjár­sjóður sem fór alveg fram hjá okkur. Það er heil­mik­ill líf­rænn úrgangur sem kemur frá okkur og virki­lega gef­andi að stúss­ast í þessu.

Ef við bregðum okkur af bæ í lengri tíma lækkum við alltaf hit­ann í híbýlum okkar og höfum gert það í fjöl­mörg ár. Eins er ég farin að hugsa meir um það að láta aldrei vatn renna að óþörfu. Og síð­ustu ár hefur það gerst. Er að verða með­vit­aðri og með­vit­aðri með árunum.

Ég ráð­legg fólki að njóta þess að vera til og ekki bíða eftir hlut­unum. Bretta bara upp ermarnar og byrja. Við getum öll lagt ýmis­legt til þess að líf okkar sé betra og skemmti­legra. Við erum ábyrg fyrir okkar eigin lífi og okkar heislu þarf af leið­andi.