Alma leigufélag lét bera áttræðan mann og hreyfihamlaðan son hans úr íbúð þeirra – Sjáðu myndböndin

Öldruðum manni og hreyfi­höml­uðum syni hans var hent út úr íbúð sinni eftir að Alma leigu­fé­lag lét sýslu­mann og lög­reglu fram­kvæma útburð í fyrra­dag.

Það var frettin.is sem sagði frá mál­inu og birti mynd­bönd af útburð­inum. Þau má sjá neðst í frétt­inni.

Ólafur Snævar Ögmunds­son, hinn átt­ræði leigu­taki sem um ræður, fékk íbúð­ina á leigu fyrir um þremur árum síðan. Ólafur skrapp til Spánar að heim­sækja son sinn sem þá bjó þar. Í heim­sókn­inni veikt­ist Ólafur heift­ar­lega og varð að leggj­ast inn á spít­ala í þrjár vikur og þurfti að greiða sjúkra­hús­kostnað á Spáni. Vegna veik­ind­anna hafði Ólafur ekki tök á á borga leigu í tvo mán­uði og fékk því sent inn­heimtu­bréf frá Ölmu leigu­fé­lagi. Leitaði hann þá til Umboðs­manns skuld­ara sem gekk í málið og hafði sam­band við leigu­fé­lagið og til­kynni þeim að skuldin yrði að fullu greidd. Að sögn Ólafs breytti það engu því Alma leigu­fé­lag sendi Ólafi útburð­ar­bréf, þrátt fyrir lof­orð Umboðs­manns­ins. Í því bréfi var þess kraf­ist að hann færi úr íbúð­inni og leigu­samn­ingnum yrði rift.

Ólafur fékk aðvörun 17. apríl þar sem honum er gert að tæma íbúð­ina fyrir 2. maí. Reyndi þá Ólafur að hafa sam­band við Félags­þjón­ust­una og óskaði eftir neyð­ar­að­stoð. Fékk hann þau svör að ekk­ert væri hægt að gera fyrir hann og að margra ára bið væri eftir íbúð hjá þeim.

Þeir Ólafur og sonur hans, Auðunn Snævar Ólafsson, sem er í hjóla­stól eftir umferða­slys, eru því nú orðnir heim­il­is­lausir en ætla að vera á hót­eli til að byrja með. Blaða­maður Frétt­ar­innar spurði sýslu­mann hvert menn­irnir ættu að fara og fékk þau svör að þeir gætu til að mynda farið í gisti­skýli.

Í mynd­bandi sem birt­ist hjá frettin.is segir Ólafur að hann hafi þurft að borga 220.000 krónur í leigu fyrir íbúð­ina en að hún sé í nið­ur­níðslu. Nefnir hann sem dæmi að hann hafi neyðst til að hafa ísskáp­inn inni í fata­skáp í for­stof­unni því hann hafi ekki kom­ist fyrir í eld­hús­inu. Þá segir hann að elda­vélin hafi aldrei virkað.

Alma leigu­fé­lag er afar umdeilt félag sem hefur verið gagn­rýnt harka­lega fyrir snarpar hækk­anir á íbúð­ar­leigu síð­ustu ár.

Í mynd­bönd­unum sem birt­ast hér fyrir neðan má sjá hvar átta verka­menn á vegum Ölmu leigu­fé­lags voru mættir til að tæma íbúð­ina.