Velferðarsvið Akureyrarbæjar skerðir þjónustu við íbúa vegna manneklu. Ekki hefur tekist að finna nægt starfsfólk svo hægt sé að sinna þeim störfum sem þjónustan býður.
Þeir sem nýta sér heimaþjónustu eru aðallega aldraðir og fatlaðir en samkvæmt reglum Akureyrarbæjar er þjónustan hugsuð fyrir þá sem þurfa á henni að halda vegna skertrar getu, fjölskylduaðstæðna, álags, veikinda eða fötlunar.
Bergdís Ösp Bjarkadóttir forstöðumaður heimaþjónustu hjá Akureyrarbæ, sagði í samtali við RÚV að byrjað hafi verið að auglýsa störf strax eftir áramót. Umsóknir hafa ekki verið nægilega margar. „Þannig við erum að leggja áherslu á að aðstoða fólk eins og á morgnanna og kvöldin. Að klæða sig og allur þessi félagslegi stuðningur, við reynum að mæta þeirri þörf eins og hægt er Fólk sem kemst ekki inn á hjúkrunarheimili er frekar heima og þarf umfangsmikla þjónustu heim. Þess vegna þurfum við að forgangsraða og þjónusta eins og þrif, við verðum bara að setja hömlur á það,“ sagði Bergdís.
Athugasemdir