Keldan, þjónustufyrirtæki sem sem veitir aðgang að skrám sem reknar eru af opinberum aðilum á Íslandi, sendi Þorgrími Sigmundssyni varaþingmanni Miðflokksins bréf þess efnis að fyrirhugað væri að skrá 14 ára gamalt barn hans í gagnagrunn sem inniheldur lista yfir einstaklinga í áhættuhópi vegna stjórnmálalegra tengsla, þ.m.t. fjölskyldur þeirra og nána samstarfsmenn.
Þetta kemur fram í grein á Vísi í dag en þar lýsir Þorgrímur aðgerðinni sem svívirðu.
Hann gerir ekki athugasemd við að nafn hans sé á þessum lista en vill að börnin hans séu látin í friði.
Skráningar á listann þýðir að aukið eftirlit er haft með einstaklingnum af hálfu fjármálafyrirtækja sem gæti haft í för með sér tafir á afgreiðslu eða jafnvel að viðkomandi fái ekki þjónustu í einhverjum tilfellum. Með auknu eftirliti má gera ráð fyrir að einstaklingar á listanum verði fyrir því að einstaklingsfrelsi þeirra þegar kemur að fjármálum verði að einhverju leyti skert.
PEP stendur fyrir „Politically Exposed Person“ sem gefur til kynna að aðilar listans séu viðriðnir stjórnmál, beint eða óbeint. Skráning á slíkan lista gefur ekki til kynna að aðilar á listanum séu glæpamenn eða grunaðir um slíkt en óbeinir aðilar eru skráðir vegna mögulegra áhrifa sem þeir gætu haft á þá sem skráningin kemur til út af eða stöðu sem gæti valdið því að þeir gætu verið notaðir til að greiða leið peningaþvættis eða hryðjuverka.
Athugasemdir