Neytandi vikunnar er Una Sighvatsdóttir. Una er 34 ára og býr í Mosfellsbæ með Jóni Kort ásamt tveimur börnum þeirra. Hún er deildarstjóri frístundar í Helgafellsskóla í Mosfellsbæ og dýrkar starfið. Una elskar að útiveru, ferðlög og eyða tímanum með fjölskyldu og vinum.
Gerir þú verðsamanburð á vörum og þjónustu?
Ég viðurkenni að ég er ekki nógu dugleg að gera það. Það hefur alveg komið fyrir en ég þarf klárlega að bæta mig í því.
Hvernig sparar þú í matarinnkaupum?
Ég reyni mitt besta til að plana vikuna fyrirfram og gera innkaupalista út frá því. Svo þarf ég að sjálfsögðu að halda mig við listann þannig að það læðist ekkert í körfuna sem vantaði ekki á heimilið. Mér finnst líka mjög þægilegt að gera stóra rétti í einu svo ég geti fryst afgangana og nýtt þá seinna.
Endurnýtir þú? Ertu með ráð til annarra?
Ég reyni mitt allra besta til að endurnýta. Það eru þá helst föt sem eru endurnýtt á mínu heimili. Við erum mjög heppin að hafa fengið mikið gefins af barnafötum frá fjölskyldu og vinum. Svo höfum við að sjálfsögðu keypt alls konar í Barnaloppunni. Ég hef svo sjálf verið með bás í bæði Barnaloppunni og Extraloppunni til og fengið ágætis summu út úr því. Mitt besta ráð til annarra er að skella sér í hóp á facebook sem heitir „Áhugahópur um endurvinnslu og endurnýtingu“. Þar getur maður oft auglýst alls konar dót sem aðrir geta endurnýtt.
Hvað hefur þú í huga þegar þú kaupir mat, fatnað og gjafir?
Ég vil helst að matvaran mín endist sem lengst svo ég þurfi að fara sem sjaldnast í búðina. Ég reyni líka að kaupa mér föt sem er hægt að nýta sem hvers dags en líka hægt að vera í þeim þegar maður fer eitthvað fínt. Ég er oftast búin að pæla mikið í gjöfum sem ég kaupi því ég vil að þær nýtist sem best á sama tíma og viðkomandi verður glaður með gjöfina. Ég er til dæmis með „excel“ skjal sem ég hef nýtt í mörg ár þar sem ég skrifa inn jólagjafahugmyndir þegar einhver í kringum mig nefnir eitthvað sem hann langar í eða vantar. Þannig get ég keypt gjafir á tilboðsdögum sem ég veit að verða notaðar.
Hverju átt þú erfiðast með að draga úr kaupum á?
Líklega alls konar barnadóti sem mér finnst mjög sniðugt þegar ég sé það á netinu.
Skiptir umhverfisvernd þig máli?
Að sjálfsögðu skiptir það mig og okkur öll máli.
Annað sem þú vilt taka fram?
Hamingjan fellst ekki í því að eiga dýrasta og flottasta dótið. Verum dugleg að nýta hlutina okkar vel.
neytandi vikunnar
Borgarfulltrúinn sem vill kaupa falleg föt: „Ákveðnar verslanir ættu að taka sig á“
Tómas er fótboltaverkfræðingur sem vill gott úrval: „Löngun samhliða þörf“
Óli Bíó er versti kokkur í heimi: „Ætti kannski byrja að taka mig á“
Gerir unnustu sína brjálaða með tuði: „Endar í geymslunni“
Hjálmar gaf vini sínum dósatunnu: „Tek alltaf plast með mér erlendis og hendi því þar“
Athugasemdir