Útvarp 101 hefur hætt útsend­ingum.

Frá árinu 2018 hefur Útvarp 101 verið ein fers­kasta útvarps­stöð lands­ins þar sem margir af bestu útvarps­mönnum lands­ins hafa átt heim­ili. Nú hefur verið ákveðið að leggja stöð­ina niður og munu eig­endur hennar ein­beita sér að fram­leiðslu sjón­varps­efnis. 

Meðal útvarps­manna sem hafa starfað hjá Útvarpi 101 má nefna Aron Má Ólafsson, Sögu Garð­ars­dóttur, Unnstein Manuel Stef­áns­son, Svan­hildi Grétu Krist­jáns­dóttur, Sig­ur­bjart Sturlu Atlason, Jóhann Krist­ó­fer Stef­áns­son, Birnu Maríu Más­dóttur og Loga Pedro Stef­áns­son og fleiri. Útvarps­stöðin setti sér það mark­mið að fjalla um popp­kúltúr, listum og mál­efnum ungs fólks.

Hægt er að lesa til­kynn­ingu félags­ins hér fyrir neðan

„101 Productions ehf. hefur ákveðið að gera ótíma­bundið hlé á útsend­ingum útvarp­stöðv­ar­innar Útvarp 101 FM 94.1. Breytt rekstr­ar­um­hverfi og ytri aðstæður hafa orðið til þess að stjórn og eig­endur félags­ins telja kröftum þess betur varið í áfram­hald­andi fram­leiðslu sjón­varps- og ann­ars afþrey­ing­ar­efnis utan útvarps­út­send­inga. Samhliða þessum breyt­ingum mun félagið flytja sig um hús­næði og kveður því einnig höf­uð­stöðvar útvarps­ins á Hverf­is­götu 78. Á allra næstu mán­uðum er nýs efnis frá 101 Productions að vænta á skjám lands­manna, þar á meðal má nefna nýja þátta­röð af hinum geysi­vin­sælum þáttum Æði, heim­ild­ar­mynd og tvær áhuga­verðar þátt­araðir tengdar menn­ingu og þjóð­málum sem nánar verður til­kynnt um síðar.

Útvarp 101 þakkar dyggum hlust­endum sínum og öllu því ótrú­lega hæfi­leika­fólki sem kom að starf­semi þess með einum eða öðrum hætti á und­an­förnum fimm árum. Stöðin var stofnuð í þeim til­gangi að auðga menn­ing­ar­líf lands­ins og gefa góðum hug­myndum vett­vang og far­veg til að blómstra. Við vonum að það ætl­un­ar­verk hafi tek­ist. 101.“