Birta Birg­is­dóttir er 26 ára frí­stunda­leið­bein­andi en hún hefur unnið á frí­stunda­heim­ili og í félags­mið­stöð und­an­farin sex ár. Birta er alin upp í Hlíðunum en býr núna í Laug­ar­dalnum með Daníel Alvin, unnusta sínum, stjúp­syni og nýfæddum syni. Birta elskar að ferð­ast, syngja og teikna ásamt að kynna sér fata- og hús­gagna­hönnun. Birta er neyt­andi vik­unnar.

Gerir þú verðsamanburð á vörum og þjónustu?

Já, ég pæli mjög mikið í því. Sér­stak­lega þegar kemur að stærri hlutum, þá er ég lík­leg til að draga upp Excel skjalið og sitja heil­lengi yfir því. 

Hvernig sparar þú í matarinnkaupum?

Ég reyni að vera dug­leg að fara vel yfir ísskáp­inn minn og allan mat áður en ég fer í búð­ina. Þá get ég betur ákveðið hvað á að vera í mat­inn út vik­una miðað við hvað er nú þegar til og þarf þá ekki að kaupa eins mikið. 

Endurnýtir þú? Ertu með ráð til annarra?

Já, ég pældi sér­stak­lega mikið í því þegar ég var ólétt. Ég keypti nán­ast ekk­ert nýtt handa syni mínum. Það sem að ég fékk ekki gef­ins eða lánað frá fjöl­skyldu og vinum keypti ég notað í Barna­lopp­unni, á Bland eða á Facebook Marketplace. Sparaði heilan hell­ing á því.

Hvað hefur þú í huga þegar þú kaupir mat, fatnað og gjafir?

Eins og ég nefndi áðan þá hef ég það í huga hvað ég á til heima þegar ég kaupi mat. Það hefur breyst mikið hvernig ég kaupi mér föt, ég fer ekki lengur inn í búðir og er bara að leita að ein­hverju flottu. Núna er ég frekar að leita að ákveðnum hlutum sem mig hefur lengi langað í eða virki­lega vantar. Ef að ég rekst síðan á eitt­hvað fal­legt sem ég var ekki að leita að sleppi ég því oft­ast að kaupa það og hugsa að ég komi aftur seinna ef að mig langar ennþá í þetta. Í lang­flestum til­fellum fer ég ekki aftur. Auðvitað hef ég alveg lent í því að fylgja þess­ari reglu minni ekki eftir og keypt eitt­hvað á staðnum en það ger­ist mjög sjaldan. Hvað varðar gjafir þá reyni ég nú bara að vera sniðug og kaupa eitt­hvað sem ég veit að ein­stak­lingnum langar í eða myndi hafa gaman að. Í vina­hópnum mínum þá sleppum við því líka stundum að gefa hvort öðru gjafir og förum frekar saman út að borða eða í leik­hús.

Hverju átt þú erfiðast með að draga úr kaupum á?

Örugg­lega skyndi­bita, það getur verið freist­andi eftir langan dag að panta bara pizzu frekar en að elda, sér­stak­lega á þriðju­dögum.

Skiptir umhverfisvernd þig máli?

Já, að sjálf­sögðu en það eru auð­vitað hlutir sem ég gæti gert betur.

Annað sem þú vilt taka fram?

Nei.