Jón Erlendsson segir hegðun Nikola Djuric óásættanlega.
Eins og Mannlíf hefur fjallað um þá kastaði Nikola Djuric, leikmaður Hauka, bjórdós úr stúkunni á leik Breiðabliks og Víkings á mánudaginn og var dósinni kastað í átt að knattspyrnuvellinum. Er málið hugsanlega einsdæmi þegar kemur að íslenska knattspyrnuheiminum. Mannlíf hafði samband við Hauka til að spyrjast fyrir um hegðun Nikola á leiknum
„Mér er svo sem ekkert meira kunnugt um málið en það sem ég hef lesið í fjölmiðlum,“ sagði Jón Erlendsson, formaður meistaraflokksráðs Hauka, í samtali við Mannlíf. „Við í Haukum gerum að sjálfsögðu kröfu til leikmanna, stjórnarmanna og stuðningsmanna að þeir hegði sér almennilega og sýni háttvísi og kurteisi, hvort sem það er innan eða utanvallar.“
Þá sagði Jón að í samningum sem Haukar gera við leikmenn sé ýmsar klausur að finna um háttvísi þeirra og félagið taki leiðbeinandi samtöl við ungt Haukafólk ef það virðist vera stíga feilspor áður en illa fer.
„Hvað varðar Nikola þá hefur það mál ekkert ratað á borð okkar formlega en að sjálfsögðu ef Haukar myndu ákveða að semja við hann á einhvern hátt þá myndum við taka samtal við hann um þetta og að sjálfsögðu gengur ekki að okkar fólk hagi sér svona, þrátt fyrir að vera á öðrum vettvangi sem tengist ekki Haukum beint,“ sagði Jón um Nikola og framtíð hans hjá Haukum. Nikola spilaði sem lánsmaður í sumar með liðinu en hann er samningsbundinn Þrótti Vogum til loka 2023.
Athugasemdir