Ingigerður Jónsdóttir, nágranni Birnu, segir aðeins hálf sögu sagða
Í síðustu viku sagði Birna Sigmundsdóttir, íbúi í Laugardal, frá því í Facebook-færslu að hún væri hætt að skreyta húsið sitt um jólin. Birna hefur í áraraðir skreytt húsið sitt mikið og hefur húsið stundum verið kallað Jólahúsið í Reykjavík. Í færslu sinni sagði hún að nýir nágrannar á hæðinni fyrir ofan hana kunni ekki að meta skreytingarnar og hafi fjarlægt og skemmt þær sem hún hafði sett út.
Í framhaldi af þessari færslu fjölluðu mbl.is og Heimildin um málið og var nokkuð ljóst að almenningur hafði mikla samúð með Birnu í þessu máli. Þó var ein kona sem hafði litla samúð en það var Ingigerður Jónsdóttir, nágranni Birnu, en hún býr í húsinu við hliðina á Birnu og fólkinu sem býr fyrir ofan Birnu. Í Facebook-færslu sagði Ingigerður að ekki væri öll sagan sögð þegar kemur að samskiptum Birnu við nágranna sína. Ingigerður heldur því fram að samskipti Birnu við nágranna sína séu svo slæm að fólk endist ekki lengi á hæðinni fyrir ofan hana. Þá nefni þeir ekki samskiptavandræðin þegar íbúðin sé seld vegna þess hversu mikið þeir vilji losna frá Birnu.
„Málið er að þetta er miklu erfiðara og stærra mál heldur en hér er fjallað um. Fólk ryðst fram á ritvöllinn í þessu tilviki, dæmir nágranna og svívirðir. Ég er nágranni og votta hér með að það hafa orðið eigandaskipti efri hæðar þessa umrædda húss 6 sinnum síðan ég flutti í þetta hverfi. Það segir ýmislegt um samskipti í þessu húsi. Þegar keypt er íbúð í fjölbýli (í þessu tilviki tvíbýli) fylgir aldrei sögunni samskipti við aðra húseigendur, það er því miður svo því þeir sem selja eru svo fegnir að losna úr prisundinni að það er þagað um vandann. Dapurlegt að sjá hvað fólk er tibúið að kasta steini. Það má einnig gefa höfundi þessarar greinar ámæli um að kynna sér ekki betur aðstæður þegar um svona mál er að ræða. Góðar Stundir.“
Athugasemdir