Gunnar Smári á trúarlegu nótunum: „Þeir guð og Jesús eru að bjarga manninum frá sjálfum sér“

Gunnar Smári Egilsson segir guðs­trú holla mann­inum því þar sé hann ekki miðja alls.

Sós­í­alista­for­ing­inn Gunnar Smári Egilsson skrif­aði nokkuð heim­speki­lega Facebook-færslu í gær­kvöldi þar sem hann talar um guðstrúnna. Þar segir hann að kost­ur­inn við þá trú sé sá að „innan hennar getur mað­ur­inn ekki að verið miðja alls.“ Bætir hann við að það sé „mann­inum holl­ari staða að vera hluti af ver­öld sem snýst ekki um hann sjálfan.“

Segir Gunnar Smári að menn hafi svo snúið upp á þetta með því að skapa guð í eigin mynd, sem „skapar þeim sess til að horfa niður á alla aðra.“ En hann segir Jesú hafa svarað því: „Svar Jesú var þá að segja fólki að taka ætíð stöðu við hlið hins ofsótta, fátæka, veika og for­smáða. Það væri aðeins þaðan sem hægt væri að sjá ver­öld­ina eins og hún sann­ar­lega er.“ Segir Gunnar Smári að feðgarnir Guð og Jesús séu að „bjarga mann­inum frá sjálfum sér, að skipa honum til til­vist­ar­legs sætis þar sem egó hans sviptir hann ekki vit­inu“ en að fæstir sætti sig við það. „Það er hluti hins mann­lega stands að finn­ast sinn harmur mestur, sín vel­sæld mik­il­væg­ust og sitt vit æðst. Þess vegna full­vissir Jesús fólk um að það muni stækka, ekki minnka, við að taka egóið sitt úr miðju heims­ins. Þú verður meiri þú eftir því sem þú ert minna þú.“

Að lokum segir Gunnar Smári að til þess að taka það skref, þurfi fólk fyrst að trúa. „En til þess að taka það skref þarf fólk að treysta þess­ari sölu­ræðu. Fólk þarf að trúa fyrst. Og þess vegna feta fáir þessa leið nema þeir sem lent hafa í til­vist­ar­legum háska, telja sig hafa reynt allt og sjá enga aðra leið út.“