Kristinn Hrafns­son segir að örlítið von hafi kviknað í gær þegar Joe Biden Banda­ríkja­for­seti sagð­ist vera að íhuga beiðni yfir­valda í Ástralíu um að Banda­ríkin sleppi ákærum á hendur Julian Assange.

RÚV sagði frá því í gær að Joe Biden Banda­ríkja­for­seti sé að íhuga að láta ákærur á hendur Julian Assange, fyrr­ver­andi rit­stjóra Wikileaks, falla niður en ákær­urnar eru átján og eru í tengslum við birt­ingu leynigagna Wikileaks um stríð­rekstur og glæpi Banda­ríkj­anna í Írak og Afganistan.

Í dag eru akkurat fimm ár síðan Julian Assange var færður í örygg­is­fang­elsið Belmarsh í Bret­landi en þar hefur hann mátt dúsa síðan. Mannlíf heyrði í Kristni Hrafns­syni, núver­andi rit­stjóra Wikileaks og vini Assange og spurði hann hvernig þeim félögum lit­ist á orð Joe Biden um að hann væri að íhuga málið. „Sæll. Það vill nú svo til að ég var rétt í þessu að koma út úr Belmarsh fang­els­inu eftir að hafa heim­sótt Julian. Þetta er svo­lítið sér­stakur dagur, það eru nákvæm­lega fimm ár upp á dag síðan Julian var hand­tek­inn og varpað í þessa dýflissu sem Belmarsh fang­elsið er. Það var 11. apríl 2019 sem hann var dreg­inn út úr sendi­ráði Ekvadors af bresku lög­regl­unni.“ Þannig hefst svar Kristinn en svo beinir hann orðum sínum að Joe Biden: „Orð Joe Bidens í gær­kvöldi, þar sem hann seg­ist vera að íhuga þessa beiðni ástr­al­skra yfir­valda um að Julian sé leystur undan þess­ari ákæru og fái að snúa aftur til heima­lands síns, urðu að sjálf­sögðu umtals­efni okkar Julians í morgun. Það er hægt að segja að þarna glitti í ein­hverja von en þessi von­ar­glæta er nátt­úru­lega óskýrð þannig að bæði hann og við sem erum að berj­ast fyrir hans frelsi viljum vita meira hvað hangir á spýt­unni. Og ég reikna með að blaða­menn fylgi þessu fast eftir og krefj­ist skýr­inga á því en hið eina lógíska í þessu er að málið verði hrein­lega fellt niður og Julian geti öðl­ast frelsi. Þetta er mál sem aldrei hefði átt að hefja og er til hábor­innar skammar að það sé búið að fylgja Julian í öll þessi ár.“

Kristinn bendir á að Julian hefur ekki aðeins verið í fimm ár í Belmarsh fang­els­inu heldur hafi hann verið meira og minna ófrjáls ferða sinna síðan 2010, þar af í sjö ár þar sem hann dvaldi í sendi­ráði Ekvador í London.

En hvernig líður Julian eftir allan þennan tíma?

„Líðan hans er að sjálf­sögðu í sam­ræmi við það, maður getur rétt ímyndað sér hvaða áhrif það hefur að vera sviptur frelsi í allan þennan tíma og í kring­um­stæðum þar sem örlög þín eru full­kom­lega óljós og eng­inn endir í sjón­máli. En jú, orð Bidens eru að minnsta kosti ein­hver von­ar­glenna, á því byggj­andi að ætla að það sé að minnsta kosti komið að því stigi að þessu fari að ljúka og kom­inn tími til því þetta er ekk­ert annað en ófagrar og skelfi­legar póli­tískar ofsóknir sem hafa gengið allt of langt.“

Verði Julian Assange fram­seldur til Banda­ríkj­anna gæti hann verið dæmdur í 175 ára fang­elsi og jafn­vel til dauða.