„Það er ekkert mál að bíða eftir Branson,“ segir Gísli Gíslason athafnamaður sem árið 2010, fyrir 14 árum, keypti sér farmiða út í geim með Virgin Galatic, fyrirtæki milljarðamæringsins og ævintýramannsins Richards Branson. Miði Gísla er númer 258.
Biðin ógurlega eftir geimferðinni hefur vakið mikla athygli erlendis. Gísli, sem er skráður geimfari í símaskrá, segir í samtali við Mannlíf að hann reikni með að komast út í geim eftir 2-3 ár. Nú er reiknað með að fyrstu menn á biðlistanum fari út í geim í sumar. Upphaflega var áætlað að ferðin með Íslendinginn út í geim yrði farin árið um sex til átta árum síðar. Sú áætlun breyttist hins vegar þegar sá hræðilegi atburður átti sér stað að tilraunaflaug með tvo flugmenn sprakk skömmu eftir flugtak í nóvember 2014.
Fjölskylda og vinir Gísla fóru þá að spyrja hann reglulega hvort hann væri ekki hættur við að fara út í geim, sem á endanum leiddi til þess að Gísli fékk vin sinn, Fjölni Geir Bragason, til að flúra vörumerki Virgin Galactic á vinstri framhandlegginn. Næst þegar þessar spurningar komu bretti Gísli upp erminni.
Miðinn kostaði á sínum tíma 200 þúsund dollara. Nú er verðmiðinn talinn vera um milljón dollarar eða rúmlega 140 milljónir íslenskra króna. Gísli segir að þrátt fyrir þessa löngu bið eftir að komast út í geim, þá séu fáir miðaeigendur að kvarta. Richard Branson kunni sitt fag og sé nokkuð góður í að sjá til þess að engum leiðist.
Hann kunni að halda partí, sem eru orðin ófá, með þeim sem eru á listanum yfir þá sem bíða þess að komast út í geim. Gísli er ekki í vafa um að geimferðin sé handan við hornið. Aðeins einn Íslendingur, Bjarni Tryggvason, hefur áður farið út í geim. Hann var með kanadíska fánann með sér.
„Ég fer með íslenska fánann með mér,“ segir Gísli.
Athugasemdir