Íslendingar höfðu lítinn áhuga á Heru

Íslenska þjóðin hafði lít­inn áhuga á fyrri und­ankeppni Eurovision sem haldin var í gær­kvöldi miðað við fyrri ár. Und­an­farin þrjú ár hefur með­al­á­horf mælst milli 53-60% en var aðeins 35% í gær en RÚV greinir frá þessu. Þá var upp­safnað áhorf aðeins 56% í ár miðað 64-69% árin þrjú á undan.

Valgeir Vil­hjálms­son, mark­aðs­rann­sókn­ar­stjóri RÚV, bjóst við verra áhorfi. „Ég gerði alveg ráð fyrir því, búin að vinna í þessu í 20 ár, ég gerði alveg eins ráð fyrir svona 40% áhorfi. Miðað við umræð­una sem hefur verið og miðað við það að það voru tón­leikar í opinni dag­skrá á Stöð 2, úrslita­keppni í Subway deild­inni og leikur í Meist­ara­deild­inni,“ sagði hann við RÚV um málið.

Rétt er þó að taka fram að um bráða­birgða­tölur frá Gallup er að ræða og gætu þær breyst lít­il­lega.

Keppnin í ár hefur þótt gíf­ur­lega umdeild bæði hér­lendis og erlendis vegna þátt­töku Ísrael en margir telja að banna ætti þátt­töku lands­ins en Ísrael hefur drepið rúm­lega 34 þús­und Palest­ínu­menn á und­an­förnum mán­uðum.