Búið er að fresta brott­vísun Emmu litlu, þriggja ára stúlku frá Venes­ú­ela, fram yfir mjaðmalið­hlaups­að­gerðar. Vísir segir frá mál­inu.

Fjöl­skylda Emmu fékk upp­runa­lega synjun um dval­ar­leyfi frá kæru­nefnd útlend­inga­mála í nóv­em­ber en þau koma frá Venes­ú­ela. Lögmaður fjöl­skyld­unnar, Jón Sig­urðs­son, sótti þá um leyfi frá Útlend­inga­stofnun svo að fjöl­skyldan fengi dval­ar­leyfi á land­inu þar til Emma kæm­ist í bráð­nauð­syn­lega skurð­að­gerð.

Sjá einnig: Stjórn Solaris for­dæmir fyr­ir­hug­aða brott­vísun á Emmu og skorar á ráð­herra að beita sér

Að ráði íslenskra lækna, hafði Emma litla farið í skurð­að­gerð þar sem fót­legg­ur­inn var festur við mjaðma­grind­ina og málm­plötu komið þar fyrir. Þann 10. febr­úar næst­kom­andi stóð til að fjar­lægja málm­plöt­una en til stóð að vísa fjöl­skyld­unni úr landi á morgun. Fjöl­skyldan sýndi sam­starfsvilja og sótti um aðstoð við sjálf­vilj­uga heim­för en báðu um frestun á heim­för þar til aðgerðin væri yfir­staðin. Á það féllst Útlend­inga­stofnun hins vegar ekki á og var beiðn­inni end­an­lega hafnað í gær.

Degi síðar hefur svo orðið við­snún­ingur í mál­inu en fjöl­skyld­unni barst bréf upp úr klukkan þrjú í dag þar sem þeim var til­kynnt að brott­vís­un­inni yrði frestað fram yfir aðgerð­ina. Var beiðni um frest­un­ina sam­þykkt á grund­velli fram­lags lækn­is­vott­orðs.

„Ég fékk nýtt vott­orð í dag frá lækn­inum sem hefur verið að sinna stelp­unni, fram­kvæmdi aðgerð­ina og kemur til með fram­kvæma næstu aðgerð. Eftir að það barst sendi ég inn nýja beiðni um frestun á þessu og það var sam­þykkt,“ segir Jón Sig­urðs­son, lög­maður hjá Land­lög­mönnum í sam­tali við Vísi. Bætti hann við: „Þau vísa í þetta vott­orð þannig að það skiptir greini­lega máli,“ segir hann.

Aðspurðu hvort ein­hver dag­setn­ing sé á brott­vís­un­inni svarar Jón því til að það sé óskýrt:

„Það er ekki skýrt. En mér finnst mega ætla það út frá þessu svari að það sé miðað við þessa aðgerð og vænt­an­lega ein­hverja eft­ir­fylgni. Hún verður ekki send úr landi nýbúin úr aðgerð. Við erum að tala um ein­hvern tím­ann eftir 10. febr­úar,“ segir Jón. Um næstu skref fjöl­skyld­unnar segir Jón: „Eins og staðan er núna þá er fjöl­skyldan glöð að kom­ast í þessa aðgerð og fók­us­inn er á því.“