Jakob Þ. Möller, lögfræðingur og fulltrúi í mannréttindanefnd Sameinuðu þjóðanna lést 14. janúar á Vífilsstöðum í Garðabæ, 88 ára að aldri.
Jakob fæddist 28. október 1936 í Reykjavík en foreldrar hans voru Gunnar J. Möller, hættaréttarlögmaður og forstjóri Sjúkrasamlags Reykjavíkur og Ágúst Sigríður Johnsen Möller.
Vorið 1956 lauk Jakob stúdentsprófi frá Menntaskólanum í Reykjavík en frá 1956 til 1958 stundaði hann nám í læknisfræði við Háskóla Íslands. Lauk hann þar prófi í forspjallsvísindum vorið 1957 og kenndi við framhaldsskóla í Reykjavík frá 1958 til 1961. Eftir það hóf hann lagananám við Háskóla Íslands og lauk þaðan embættisprófi í lögum vorið 1967 en réðst þá sem fulltrúi Sýslumannsins í Suður-Múlasýslu á Eskifirði. Frá ársbyrjun 1968 vann hann síðan fulltrúi Bæjarfógetans í Keflavík. Þremur árum síðar, 1971 var hann ráðinn til starfa hjá mannréttindanefnt Sameinuðu þjóðanna og varð það hans ævistarf, fyrst í höfuðstöðum SÞ í New York en síðar í Genf í Sviss, þegar að skrifstofa mannréttindanefndarinnar flutti þangað.
Árið 1996 var Jakob kosinn af ráðherranefnd Evrópuráðsins til að gegna starfi dómara við alþjóðlegan mannréttindadómstól fyrir Bosníu og Hersegóvínu og starfaði þar þangað til störfum dómstólsins lauk árið 2003. Jakob flutti eftir það fyrirlestra um mannréttindi víðsvegar um heiminn og var gefin út bókin International Human Rights Monitoring Mechanisms, honum til heiðurs. Ólafur Ragnar Grímsson, þáverandi forseti Íslands, sæmdi Jakob fálkaorðunni fyrir mannréttindastörf á alþjóðavettvangi 1998 og þá var hann einnig útnefndur heiðursprófessor við Háskólann á Akureyri.
Árið 1968 kvæntist Jakob Þórunni Wathne, cand. jur. en foreldrar hennar voru Stefán Wathne framkvæmdarstjóri og Soffía Guðrún Hafstein Wathne. Sonur þeirra er Gunnar Stefán, fæddur 1969 en hann er með BA-próf í stjórnmálafræði og Sovétfræðum við Harvard-háskóla. Jakob og Þórunn skildu.
Seinn eiginkona Jakobs var Maria Isabel Contreras en þau bjuggu í bænum Cessy í Frakklandi, nálægt Genf. Þau skildu einnig. Árið 2017 flutti Jakob alkominn til Íslands, eftir að hafa verið með annan fótin hér á landi í nokkur ár.
Mbl.is sagði frá andlátinu.
Athugasemdir