Hildur Björnsdóttir borgarfulltrúi Sjálfstæðisflokksins skrifar á Facebook-síðu sinni um þau tíðindi að Einar Þorsteinsson borgarstjṕri skyldi sprengja meirihlutann.
„Upp er komin flókin staða en við slíkar aðstæður er ábyrgðarhluti að mynda starfhæfan meirihluta um mikilvæg verkefni. Sjálfstæðisflokkurinn er sannarlega reiðubúinn að axla þá ábyrgð og taka til hendinni við stjórn borgarinnar. Fimmtán mánuðir eru eftir af kjörtímabilinu og því skammur tími til stefnu. Æskilegast væri að mynda meirihluta sem næði árangri og samstöðu um löngu tímabæra tiltekt í fjármálum borgarinnar, stórsókn í húsnæðisuppbyggingu og átak í leikskóla- og daggæslumálum. Þá mega skipulagskreddur ekki koma í veg fyrir skynsamlega nálgun í málefnum Reykjavíkurflugvallar.“
Hildur segir einfaldlega að „við skuldum borgarbúum Reykjavík sem virkar – einfaldari hversdag fyrir fjölskyldur, greiðari samgöngur fyrir fólk og fyrirtæki og kerfi sem hefur að markmiði að leggja fólki lið, en ekki leggja stein í götu þess.“
Hún bætir því við að „auðvitað væri einfaldasta leiðin til að ná árangri með þessi mál að mynda meirihluta þeirra fjögurra flokka sem funduðu um helgina. Þar er augljós málefnalegur samhljómur og erfitt að sjá hvernig sambærilegum árangri yrði náð í öðru mynstri. Það er ákall eftir bráðaaðgerðum í borginni, og við slíkar aðstæðar þurfa stjórnmálaflokkar að finna til ábyrgðar. Hvergi hefur borið skugga á samstarf sjálfstæðismanna og Flokks fólksins í borgarstjórn, og kom útspil þeirra því nokkuð á óvart.“
Hildur nefnir að endingu að „dyr okkar sjálfstæðismanna standa enn opnar en eðli máls samkvæmt þarf nú að skoða fleiri möguleika. Það eru mörg mynstur sem koma til greina og það væri óábyrgt af stærsta flokknum í borginni að útiloka nokkuð við þessar aðstæður – því stjórnlaust skip steytir að endingu á skeri.“
Athugasemdir