„Ég myndi segja að stíll­inn minn sé svo­lítil blanda af 70´s-hippa og slatta af 90´s með róm­an­tískum kán­tr­í­und­ir­tóni. Mér líður best þegar það er hreyf­ing í flík­unum en ég er mjög frjáls­leg og finnst gaman að blanda saman alls kyns fínu þó að engin sér­stök for­múla sé á bak við það. Að mínu mati er góð peysa skyldu­eign í alla fata­s­kápa en sjó­ara­peysan frá Ell­ing­sen heillar mig mjög þessa dag­ana. Eins langar mig í upp­háar hvítar víðar galla­buxur en ég stór­ef­ast um að ég gæti haldið þeim hvítum lengi. Djúpir litir henta mér í flestum til­fellum best en þó finnst mér gaman að ögra litapa­lett­unni af og til.“

„Þessi ljós­bláa silki­skyrta hefur mjög til­finn­inga­legt gildi en bróðir minn keypti hana fyrir mig í Japan. Fyrsta og eina skiptið sem hann hefur keypt flík á mig, mér þykir mjög vænt um hana og nota hana vel og spar­lega.“ Mynd/Aldís Páls­dóttir.

Spurð í hvaða versl­unum Rósa versli mest nefnir hún fyrst kaup­mann­inn á horn­inu. „Mér finnst skemmti­leg­ast að versla þegar ég þarf að hafa aðeins fyrir því að róta og gramsa eftir ger­semum sem leyn­ast inn á milli því þar eru oft og tíðum vand­aðar flíkur á góðu verði. Ég reyni að kaupa mest af kaup­mann­inum á horn­inu og líður lang­best í litlum rót­grónum fata­versl­unum. Mér finnst skemmti­leg­ast að kaupa yfir­hafnir og dregst alltaf að fal­legum síðum kápum og peysum því þá þarf ég ekki að fara í mát­un­ar­klef­ann. Það er hins vegar leið­in­leg­ast að kaupa galla­buxur og brjósta­hald­ara í ljósi þess hversu mjög ég reyni að forð­ast mát­un­ar­klef­ann. Mér finnst miklu betra að máta í miðri búð og valsa svo um og finna hvernig flíkin hreyf­ist á mér og ákveða út frá því hvort hún verði mín eða ekki.“

„Ég á nokkra silki­klúta sem mér þykir vænt um og þennan hring erfði ég eftir ömmu mína og nöfnu, hann er mér afar kær.“ Mynd/Aldís Páls­dóttir

Þegar talið berst að furðu­leg­ustu kaup­unum rifjar Rósa upp eft­ir­minni­leg kaup á ung­lings­árum. „Fyrstu kaupin á Asos vöktu ekki mikla lukku á heim­il­inu. Ég var sextán ára og hafði keypt drag­síðan her­manna­kjól en pabbi þurfti að borga heil­mikla fjár­upp­hæð fyrir heim­send­ingu á kjólnum og því varð ég að standa með þessum kaupum mínum. Til að gera langa sögu stutta hefur kjóll­inn fengið að hanga í góðan ára­tug ósnertur í fata­skápnum.“

Fullt nafn: Rósa Rún Aðal­steins­dóttir.

Starfs­heiti: List­dans­kenn­ari.

Aldur: 27 ára.

Fal­leg­asti fata­lit­ur­inn? Djúpir litir, eins og kónga­blár og vín­rauður.

Besta lykt í heimi? Mig langar að segja bens­ín­lykt. Einnig nýþvegin og úti­viðruð sæng­ur­föt og lyktin frá reyk­vél­inni í leik­hús­inu.

More is less eða Less is more? More is more alla leið.

Þægindi eða útlit? Bæði betra, það sagði mamma mín alla vega.

Á döf­inni: Ég hef verið að taka kúrsa á Netinu, ann­ars vegar um manns­lík­amann og hvernig við hreyfum okkur og hins vegar um and­lega heilsu. Ég er með spenn­andi dans­verk­efni fram undan sem er mjög gef­andi og frá­bært.

„Þessar ljósu harlem-buxur keypti ég í Gyllta kett­inum nýverið á litlar þús­und krónur, það voru mjög góð kaup.“ Mynd/Aldís Páls­dóttir