Bakað úr maísmjöli: maísbrauð – arepas

Maís­mjölið sem ég not­aði í brauðin fékk ég í Afrísku búð­inni í Efra-Breið­holti, Afrozone, en sams­konar teg­und fæst einnig í búð­inni Fisku og Mai Thai og eflaust ein­hverjum fleiri búðum. Best er að nota svo­kallað Masa-maís­mjöl í brauð­gerð, eins og þessa sem hér er gerð, slíkt mjöl er einnig notað í tortillu­gerð.

Oftast þarf að leggja leið sína í sér­búðir til að finna það en það er alveg þess virði, svo er líka gaman að hvíla sig frá hveit­inu og nota eitt­hvað annað í stað­inn og kynn­ast hefðum og annarri mat­ar­menn­ingu í leið­inni.

Maís­brauð – arepas
8-10 stykki

Arepas eru brauð sem eiga rætur að rekja til Venes­ú­ela og Kólumbíu og eru mjög vin­sæl þar. Ég þekki unga stelpu sem fór sem skiptinemi til Venes­ú­ela og segir hún að brauðin séu nær und­an­tekn­inga­laust borin fram með öllum mat.

Ann­að­hvort eru brauðin skorin eins og pítu­brauð og álegg sett inn í brauðin eða eitt­hvað er sett ofan á þau. Við fylltum þau með sal­ati, avókadó, skinku, lauk, tómötum og chili-majónessósu og kom það vel út en hægt er að fylla þau með hverju sem er.

500 ml heitt vatn
1 tsk. salt
250 g  P.A.N hvítt masa-maís­mjöl eða Ma Se Ca
olía til að steikja upp úr

Blandið vatni og salti saman og hrærið þar til saltið leys­ist upp. Blandið maís­mjöl­inu saman við í skömmtum og vinnið með hönd­unum þar til deigið verður að frekar mjúku og blautu deigi.

Skiptið því í 8 hluta á stærð við gólf­kúlur og fletjið út í litlar kökur sem eru um 1 cm að þykkt. Steikið á t.d. pönnu­kökupönnu í 4-5 mín. á hvorri hlið við með­al­hita eða þar til kakan er orðin gull­in­brún að lit.

Hægt er að nota brauðin sem sam­lokur, grunn í pít­su­botn eða eins og pítu­brauð og fylla með alls­konar fyll­ingum eins og gert er hér.

Myndir / Hákon Davíð Björns­son