Rúllutertur eru klass­ískar, ein­faldar og fal­legar og passa við margs­konar til­efni. Í þess­ari er mar­ens­botn sem parast vel með berjum og súkkulaði. Best er að nota rúllutertu­form en ef það er ekki við hönd­ina er hægt að teikna upp­gefið mál á smjör­pappír og smyrja mar­ens­deig­inu á það því mar­ens­inn er stífur og rennur ekki til. Hægt er að útbúa þessa tertu með 1-2 daga fyr­ir­vara og einnig er í lagi að frysta hana.

Marensrúlluterta með hindberjum

4 eggja­hvítur
225 g sykur
2 tsk. edik
50 g möndlu­flögur
Fylling:
225 dökkt súkkulaði
2 stór egg, aðskilin
200 g grísk jógúrt
200 g hind­ber

Hitið ofn­inn í 170°C. Þeytið eggja­hvítur og bætið sykri saman við í skömmtum ásamt ediki. Klæðið 30×20 cm rúllutertu­form með smjör­pappír. Smyrjið mar­ens­inum jafnt yfir formið og dreifið möndl­unum yfir. Bakið í 30 mín. Takið kök­una út og hvolfið henni á nýja smjör­papp­írs­örk. Bræðið súkkulaðið yfir vatns­baði. Takið af hit­anum. Þeytið eggja­hvít­urnar og blandið þeim svo saman við súkkulaðið ásamt eggjar­auðum og jógúrti. Smyrjið blönd­unni yfir mar­ens­botn­inn. Dreifið hind­berj­unum yfir en skiljið nokkur ber eftir til að skreyta með. Rúllið tert­unni upp og látið sam­skeytin snúa niður.

Umsjón og stílisti/Bergþóra Jóns­dóttir Myndir/Hákon Davíð Björns­son