Á mínu heim­ili tíðkast að búa til veg­legan osta­bakka með ýmsu með­læti eftir morg­un­mat­inn á aðfanga­dag. Bakkinn er síðan settur á borð­stofu­borðið og fær að sitja þar fyrir heim­il­is­menn og gesti og gang­andi til að narta í. Þannig er alltaf eitt­hvert góð­gæti fyrir þá sem koma óvænt í heim­sókn og við getum verið róleg í und­ir­bún­ingi jól­anna.

Það er tími og staður fyrir bragð­bætta osta en ég hvet ykkur til að reyna að velja hreina osta þar sem bragð þeirra fær að njóta sín. Auðvitað eru engar reglur varð­andi valið en gott er að miða við að vera með a.m.k. einn ost í hverjum flokki af eft­ir­far­andi:

Þrosk­aður ostur – t.d. gouda, port salut eða cheddar
Mjúkur ostur – t.d. geita­ostur, brie eða camembert
Harður ostur – t.d. manchego, prima donna eða parmesan
Gráð­ostur – gorgonzola, stilton eða roquefort

Þegar búið er að velja ostana á bakk­ann þá er gott að hugsa um hvað parast vel með þeim. Hunang er frá­bært með gráð­osti og geita­osti og fíkjusulta passar með lang­flestum ostum. Pæklað græn­meti er gott til að hreinsa bragð­lauk­ana á milli þess að naslað er á ólíkum ostum. Ferskir og þurrk­aðir ávextir, ásamt ólífum og hnetum, er fal­legt að setja á bakk­ann og þetta hrá­efni gerir alla osta betri. Einnig er gott að vera með dökkt súkkulaði, sterkt sinnep og ólífu­olíu á bakk­anum.

Vínber eru löngu orðin klass­ísk á osta­bakk­ann en gaman er að breyta frá þeirri venju og reyna að velja aðra ferska ávexti, t.d. mandar­ínur, fíkjur og sneiddar perur. Best er að velja þá ávexti í búð­inni sem líta vel út og eru ferskir.

Þegar raðað er á osta­bakk­ann er gott að fylgja eft­ir­far­andi röð: raðið ost­inum á bakk­ann fyrst, setjið síðan skálar á bakk­ann með ólífum, pækluðu græn­meti og hun­angi, næst er kjöt­á­legg­inu raðað á bakk­ann, látið síðan ferska og þurrk­aða ávexti og dreifið að lokum hnetum í bilin sem eftir eru.

Góð ráð

Leggið hníf fyrir hvern ost svo ost­arnir smit­ist ekki þegar þeir eru skornir niður.

Takið ost­inn úr ísskápnum a.m.k. einum klukku­tíma áður en hann er bor­inn fram. Bragð ost­anna nær ekki að njóta sín ef þeir eru kaldir, ostar eru bestir við stofu­hita.

Texti / Nanna Teits­dóttir
Mynd / Aldís Páls­dóttir