Isavia fær 6,3 milljarða lánaða til viðbótar: „Óvissan er engu að síður enn þá veruleg“

Evrópski fjár­fest­inga­bank­inn hefur sam­þykkt að veita Isavia lán upp á 40 millj­ónir evra sem sam­svarar um 6,3 millj­örðum króna. Þetta kemur fram á vef Isavia.

Þar segir að um loka­á­drátt vegna láns upp á 100 millj­ónir evra sem bank­inn veitti félag­inu árið 2018 sé að ræða, lánið er veitt til fram­kvæmda á Kefla­vík­ur­flug­velli.

„Þessi fjár­mögnun kemur til við­bótar við fjóra millj­arða sem íslenska ríkið hefur þegar lagt félag­inu til í aukið hlutafé en þeir fjár­munir voru skil­yrtir við ákveðin fjár­fest­inga­verk­efni á Kefla­vík­ur­flug­velli. Samtals hefur félagið því tryggt sér yfir 10 millj­arða króna í nýja fjár­mögnun frá því að flug til og frá Íslandi svo til lagð­ist af vegna Covid-19 far­ald­urs­ins,“ segir í til­kynn­ing­unni.

Þar er haft eftir Bjarna Bene­dikts­syni, fjár­mála­ráð­herra, að ánægju­legt sé að sjá Evrópska fjár­fest­inga­bank­ann koma með þessum hætti að fjár­mögnun upp­bygg­ingar Kefla­vík­ur­flug­vallar. „Þessi ákvörðun bank­ans sýnir vilja hans í verki til að koma með mynd­ar­legum hætti að verk­efnum sem styðja beint við end­ur­reisn hag­kerf­is­ins,“ segir Bjarni.

Svein­björn Ind­riða­son, for­stjóri Isavia, segir að þrátt fyrir lán­veit­ing­una sé óvissan áfram mikil. „Óvissan er engu að síður enn þá veru­leg en þessi ákvörðun bank­ans gerir okkur kleift að halda verk­efnum okkar gang­andi enn um sinn og veitir okkur þannig mik­il­vægt svig­rúm til áfram­hald­andi umsvifa.“