Ragnar Þór Ing­ólfs­son, for­maður VR, segir stjórn­endur Icelandair hafa toppað sig sem árásum á eigin starfs­fólk. Ragnar fjallar um ummæli Noga Nils Boga­sonar, for­stjóra Icelandair, um að starfs­menn Icelandair séu „helsta fyr­ir­staðan“ fyrir að hægt sé að bjarga rekstr­inum.

„Þeir náðu þó að toppa sig, ótrú­legt en satt, með árásum á sitt eigið starfs­fólk sem er hið raun­veru­lega verð­mæti fyr­ir­tæk­is­ins,“ skrifar Ragnar á Facebook.

Hann spyr hvort að fólk eigi að sætta sig við að vinnu­mark­að­ur­inn verði end­ur­reistur eftir kór­ónu­veiru­far­ald­ur­inn á for­sendum fjár­magns og stjórn­enda þess.

„Hvað ef sam­keppn­is­hæfnin þýðir að launa­kjörin fari á par við það sem ger­ist hjá sví­virði­leg­ustu lággjalda­flug­fé­lög­unum sem stunda gerfi­verk­töku, skattaund­an­skot, stór­felld brot á kjara­samn­ingum og mann­rétt­indum og bein­línis þrælkun á starfs­fólki sem er svo algjör­lega ótryggt í vinnu. Öllu er svo úthýst til landa sem gera litlar sem engar kröfur um skatta á stór­fyr­ir­tæki eða vel­ferð starfs­fólks,“ skrifar Ragnar.

Hann spyr hvort að fólk geti sætt sig við að fyr­ir­tækin geti farið fram á að starfs­fólk afsali sér rétt­indum í nafni sam­keppn­is­hæfni. „Sam­keppni um hvað? Verstu lífs­gæðin fyrir mestu vinn­una?“

Hann sendir starfs­fólki Icelandair bar­áttu­kveðjur og biður það um að láta ekki kúga sig út í stór­felldar launa­lækk­anir og afsal rétt­inda.

„Stjórn­endur koma og fara en starfs­fólkið er og verður alltaf grunn­stoð fyr­ir­tæk­is­ins.“

Hann segir fólkið í land­inu vera í raun­veru­legri bar­áttu um lífs­kjör. „Það hefur aldrei verið mik­il­væg­ara en nú að standa í lapp­irnar og verja rétt­indin. Við erum í raun­veru­legu stríði um lífs­kjör okkar og fram­tíð. Starfs­fólk Icelandair stendur nú í fremstu víg­línu í þessu stríði. Ekki til að bjarga sínu eigin skinni heldur fyrir okkur öll,“ skrifar hann.

Hann segir Icelandair nota hræðslu­á­róður. „Fyrir alla muni látum ekki kúga okkur eða beygja til hlíðni með hræðslu­á­róðri því það verður ekk­ert flug­fé­lag án ykkar og ekki gæfu­leg fram­tíð ef stjórn­endur Icelandair ráða för. Án vinn­andi handa, okkar, geta fyr­ir­tækin ekki starfað.“

Sjá einnig: Segir flug­freyj­ur og flug­menn Icelandair þurfa að taka á sig 50-60 pró­senta launa­lækk­un