Ýmsir þjóðþekktir einstaklingar létu áhugaverð ummæli falla í vikunni. Hér eru nokkur.
„Spurning hvort þetta endurspeglar fjölmiðilinn Markaðinn eða fjölmiðla yfirleitt eða bara samfélagið, en í nýútkomnum Markaði Fréttablaðsins eru 22 ljósmyndir af karlmönnum (að meðtöldum myndum af blaðamönnum sem allir eru karlkyns) en 2 myndir af konum,“
segir Illugi Jökulsson rithöfundur í Facebook-hópnum Fjölmiðlanördar, þar sem hann setur út á efnistök nýjasta tölublaðs Markaðar Fréttablaðsins.
„Í dag kynnti Samfylkingin nýtt merki, þar er um að ræða hvítan hring á rauðum fleti. Ætli þeim hafi á einhverjum tímapunkti dottið í huga að gúgla hverskonar samtök noti helst það myndmál? Samfylkingin á ekkert skylt við þessi samtök og þess vegna veltir maður fyrir sér af hverju þetta myndmál sé notað,“
segir Elliði Vignisson sveitarstjóri í færslu á Facebook, og uppskar fjölda ummæla og gagnrýni.
„Þetta er svo brjóstumkennanlegt kjaftæði í þér. Hefur þú aldrei séð rautt lógó eða hring? Tökum dæmi,“ svarar Karen Kjartansdóttir, framkvæmdastjóri Samfylkingar, færslu Elliða og birtir mynd með athugasemd sinni.
„Já, ég er með spurningu fyrir Þórólf. Nú stendur til að opna sundlaugar fyrir almenning 18. maí. Stendur til að halda áfram að leyfa gömlum mönnum að þurrka á sér punginn með hárblásurunum að uppfylltum ákveðnum skilyrðum eða þurfa þeir að bíða eftir næstu tilslökun?“
spyr Atli Fannar Bjarkason, verkefnastjóri vefútgáfu og samfélagsmiðla á RÚV, á Twitter.
„Ég bý svo vel að hafa á heimilinu sérfræðing í sóttvörnum og geðlækningum. Og ekki bara það heldur er sérfræðingurinn ljóðskáld gott. Grunar að eftirfarandi kveðskapur, sem var skilinn eftir á náttborði mínu, sé kominn frá þessum mikla sérfræðingi,
Ástríðan er ekki dauð
þótt öðru sé að hraka
holdið orðið eins og brauð
sem á eftir að baka.
Þannig er að eldast
ekkert fær því breytt
grána bæði og geldast
og geta ekki neitt.“
Brynjar Níelsson, þingmaður Sjálfstæðisflokksins, um fjölskyldulífið í færslu á Facebook.
Athugasemdir