„Ég sett­ist niður í gær og beið spenntur eftir útspili stjórn­valdi til handa fyr­ir­tækja sem lent hafa í skakka­föllum vegna tíð­nefnds Covid far­ald­urs. Þegar útsend­ingu lauk var ekki laust við að manni féllust hendur. Ekki var minnst svo mikið sem einu orði á stærstu atvinnu­grein lands­ins.“ Þetta skrifar Styrmir Þór Bragason, for­stjóri Arctic Adventures á Facebook.

Hann segir ferða­þjón­ust­una vera dýr­mæta atvinnu­grein sem hefur skapað mörg störf og miklar tekjur í þjóð­ar­búið und­an­farin ár. Hann varð von­svik­inn þegar rík­is­stjórnin kynnti næsta aðgerða­pakka vegna efna­hags­á­hrifa kór­ónu­veiru­far­ald­urs­ins.

Hann segir Arctic Adventures hafa varið háum fjár­hæðum und­an­farið í að taka á móti um 550 þús­und far­þegum. „Heild­ar­fjöldi starfs­manna var, þegar mest á lét, á fjórða hund­rað.“ En núna er fram­tíðin óljós að sögn Styrmis.

Ljós við enda ganganna

Hann segir frá því að hann verður var við að ferða­menn séu áfram spenntir að heim­sækja Ísland þegar far­ald­ur­inn er yfir­stað­inn og þess vegna sé mik­il­vægt að tryggja að ferða­þjón­ustan lifi þetta tíma­bil af.

„Það sem af er apríl mán­uði hafa 109 þús­und áhuga­samir ferða­mann skoðað heima­síður okkar. Þetta bendir óneit­an­lega til þess að það sé í raun ljós við enda gang­anna, en ljósið eitt og sér er ekki nóg þangað þarf að kom­ast. Allt tal um upp­bygg­ingu Íslensks efna­hags­lífs án þess að tryggja blóm­lega ferða­þjón­ustu þegar að covid krís­unni líkur, er á manna­máli, tóm tjara.“

Hann segir fólk sem starfi innan ferða­þjón­ust­unnar nú skora á rík­is­stjórn­ina að end­ur­skoða málin. „Vilji Íslend­ingar tryggja bestu lífs­kjör heims, þarf að tryggja að sú atvinnu­grein sem þau lífs­kjör hefur skapað verði til staðar þegar yfir líkur. Við í ferða­þjón­ust­unni köllum eftir því að þeir ein­stak­lingar sem að nú taka hinu stóru ákvarð­anir, átti sig á því hvað er í húfi fyrir heim­ilin í land­inu, það eru jú þau sem hagn­ast mest þegar vel árar.“