Það er útlit fyrir að bakst­ur­sæði hafi gripið lands­menn þegar sam­komu­bann tók gildi 13. mars. Sölu­tölur mat­vöru­versl­ana gefa vís­bend­ingu um þetta. Í svari Krón­unnar við fyr­ir­spurn Mannlífs kemur í ljós að sala á bakst­ursvörum hefur auk­ist um 123% í apríl ef miðað er við sama tíma­bil í fyrra. Sala á bakst­ursvörum jókst þá um 50% í mars ef miðað er við mars­mánuð í fyrra. Helstu vörur innan þess flokks eru suðusúkkulaði, hveiti, ger, lyfti­duft og köku­dropar.

Í svari við fyr­ir­spurn Mannlífs til Krón­unnar um hvaða áhrif sam­komu­bannið hefur haft á inn­kaup lands­manna segir að um leið og sam­komu­bannið var fyrst kynnt jókst salan á frysti­vörum um 55%, þá helst á frosnu fugla­kjöti og fisk, og sala á nið­ur­suðu­vörum juk­ust um 150% á milli mán­aða. Efst á þeim lista eru fisk­búð­ingur í dós, bak­aðar baunir, tómatar í dós og tún­fiskur í dós.

Bakst­ursvörur hafa rokið út í Krónunni und­an­farnar vikur. Mynd / Hákon Davíð

Þá fóru húð­vörur að selj­ast betur ef miðað er við febr­ú­ar­mánuð, þá einna helst hand­sápa (230%) og spritt.

„Þegar ástandið hefur náð ákveðnu jafn­vægi höfum við merkt að salan hefur færst til úr vörum sem hafa langan líf­tíma yfir í vörur sem skapa stemmn­ingu inni á heim­il­inu,“ segir í svari við fyr­ir­spurn Mannlífs.

Kerti, servéttur og blóm rjúka út. Og sömu­leiðis allt sem snýr að pizzabakstri. „Sala á rifnum osti, pepp­er­oni og skinku hefur auk­ist mikið.“