Helga Vala kallar eftir tafarlausum styrkjum til fjölmiðla: „..Skora á ríkisstjórn að bregðast við áður en tjón verður“

Helga Vala Helga­dóttir, þing­maður Sam­fylk­ing­ar­innar, kallar eftir því að fjöl­miðlar verði styrktir sér­stak­lega í næsta aðgerð­ar­pakka rík­is­stjórn­ar­innar. Í grein í Morg­un­blað­inu í dag bendir hún á að fjöl­miðlar geti ekki nýtt sér margar af þeim leiðum sem hafi verið kynntar, til dæmis að senda fólk í hluta­starf, en á sama tíma drag­ist aug­lýs­inga­tekjur saman.

„Aug­lýs­inga­tekjur fjöl­miðla hafa hríð­fallið eftir komu Covid og sam­komu­banns í kjöl­farið. Fjöl­miðlar geta ekki nýtt sér þær leiðir sem stjórn­völd hafa boðið upp á því það er jú ekki hægt að fresta bara greiðslum eða senda starfs­fólk í hluta­starf. Í lýð­ræð­is­þjóð­fé­lagi gegna fjöl­miðlar algjöru lyil­hlut­verki og vil ég því skora á rík­is­stjórn­ina að huga vel að útfærslu á því með hvaða hætti eigi að veita þeim stuðn­ing í næsta pakka sem kynntur verður. Það er ekki hægt að taka ákvörðun um styrk­veit­ingar til fjöl­miðla í sumar eða haust því slíkt verður að ger­ast núna. Það hafa nágranna­lönd okkar gert og ég skora á rík­is­stjórn að bregð­ast við áður en tjón verður.“

Fjöl­miðla­frum­varp Lilju Alfreðs­dóttur mennta- og menn­ing­ar­mála­ráð­herra var lagt fram í des­em­ber, en enn hefur ekki náðst sam­komu­lag um frum­varpið á þingi. Samkvæmt frum­varp­inu býðst einka­reknum fjöl­miðlum end­ur­greiðsla upp að 18% af rekstr­ar­kostn­aði, sem og heim­ild fyrir stuðn­ingi upp á fjögur pró­sent af launa­kostn­aði, gegn ákveðnum skil­yrðum.

Stöðug krafa um fréttir og afþreyingu

„Einn er sá rekstur sem enga athygli hefur fengið þegar kemur að stuðn­ingi stjórn­valda en getur lítið stuðst við þær leiðir sem þegar hafa verið sam­þykktar,“ skrifar Helga Vala. „Fjöl­miðlar eru hreint ekki að glíma við verk­efna­skort þessa dag­ana heldur er þvert á móti stöðug krafa sam­fé­lags­ins um reglu­legar fréttir af ástand­inu, krafa um almennar fréttir og síð­ast en ekki síst er mikil krafa um ýmiss konar afþrey­ing­ar­efni til að hafa ofan af fyrir okkur, börnum okkar og ung­mennum í sam­komu­banni.“

Segir Helga Vala fjöl­miðla hafa svarað þeim kröfum þeim breyt­ingum dag­skrá sinni og miðlum. „Upp­lýs­ing­arnar flæða til okkar sem og skemmti-, kennslu- og afþrey­ing­ar­efni. Fjöl­miðla­fólk hleypur hraðar en nokkru sinni á sama tíma og aug­ljós hætta steðjar að vinnu­veit­endum þess.“