Afslapp­andi og kósí er að koma heim til þeirra hjóna. Þau taka á móti okkur létt í fasi og við fáum strax strax á til­finn­ing­una að þarna getum við verið eins og heima hjá okkur. Per­sónu­legir hlutir og klass­ísk hús­gögn gefa hlý­legan tón og í eld­hús­inu sést strax að hér eru mat­gæð­ingar á ferð, enda eld­húsið vel búið góðum tækjum og tólum, veg­legar mart­eiðslu­bækur í hillum og sæl­kera­vörur í krukkum og flöskum sýni­legar þar sem vel næst til þeirra. Tveir vinir þeirra, Unnur Sig­urð­ar­dóttir og Örn Jóhanns­son, eru mætt í boðið og eru að hjálpa til í eld­hús­inu.

Glatt er á hjalla og greini­legt að þarna er saman komið hresst fólk sem finnst gaman að lyfta sér upp. Mynd/Unnur Magna

„Við erum oft með veislur en reynum að gera smá­partí úr þeim með því að láta gest­ina taka þátt í mat­ar­gerð­inni, allir koma með eitt­hvað spenn­andi og hóp­ur­inn sam­ein­ast í matseld­inni. Þannig verða oft til góðar og skemmti­legar stundir með vinum í eld­hús­inu. Við höfum yfir­leitt þennan hátt­inn á, allir hjálp­ast að og þannig þarf hús­ráð­andi ekki að standa aleinn og sveittur í eld­hús­inu allan tím­ann. Matseldin er hluti af sam­ver­unni,“ segir Berglind. Þau voru samt búin að und­ir­búa ýmis­legt fyrir fram, búið er að leggja fal­lega á borð og und­ir­búa rétti til að ein­falda elda­mennsk­una.

Ein af upp­skrift­unum er sótt í danska mat­reiðslu­bók sem fylgt hefur þeim hjónum lengi. Hún er keypt á veit­inga­staðnum Pasta Basta sem var upp­á­haldsveit­inga­staður Péturs og Berg­lindar þegar þau bjuggu í Kaup­manna­höfn. „Stað­ur­inn er því miður ekki lengur til,“ segja þau. Mynd/Unnur Magna

„Við höfum alltaf haft áhuga á mat­ar­gerð og erum óhrædd við að bregða á leik í eld­hús­inu og gera alls­konar til­raunir. Hins vegar bjuggum við lengi í Kaup­manna­höfn og var sá tími mjög „insperar­andi“ hvað varðar áhrif í elda­mennsku. Við erum oft til dæmis með hakka­buff og spæ­legg í mat­inn og gerum mikið smörre-brauð. Ítalska eld­húsið er heldur aldrei langt undan,“ segir Pétur þegar hann er spurður út í matseld­ina hjá þeim hjónum.

„En um helgar erum við alltaf með eitt­hvað gott á boðstólum og nokkuð árs­tíða­bundið hvað við veljum. Á sumrin erum við mikið með grill­aðan mat eins og lamb eða fisk, á haustin villi­bráð og á köldum vetr­ar­kvöldum er ekk­ert eins gott og mat­miklar rjúk­andi súpur, Osso Buco, Coq au vin eða eitt­hvað ind­verskt.“

Í eft­ir­rétt er boðið upp á sæl­ker­a­osta, vín­ber og fíkjur ásamt des­ertvíni. Mynd/Unnur Magna

Smám saman tín­ast gest­irnir í hús og greini­legt að hér er á ferð­inni fólk sem kann að gera sér glaðan dag en hóp­ur­inn sam­anstendur af nokkrum æsku­vinum. Auk Unnar og Arnar eru gestir kvölds­ins Birna Björns­dóttir og Elías Ill­uga­son, Óskar Sig­urðs­son, bróðir Unnar, og Rakel Páls­dóttir.

Fyrst buðu þau upp á asp­as­rétt sem þau bjuggu til þegar þau leigðu sér hús á Ítalíu ásamt æsku­vin­konum Berg­lindar fyrir nokkrum árum. Næsti réttur var pasta­réttur sem ætt­aður er frá staðnum Pasta Basta, þeirra upp­á­haldsveit­inga­stað í Kaup­manna­höfn. Í aðal­rétt var síðan spænskætt­aður salt­fisk­réttur og í lokin úrval af sæl­ker­a­ostum, vín­ber og fíkjur sem borið var fram með ítalska des­etvín­inu Dievole Vin Santo.

Ítar­legra við­tal við hjónin er í nýjasta tölu­blaði Gest­gjafans, 4. tbl. 2020. Þar eru líka upp­skriftir að rétt­unum sem Pétur Gautur og Berglind buðu upp á.

Mynd: Shutterstock

Kaupa blað í vef­verslun