Hvort sem þú ætlar að keyra hring­inn eða bara í bústað þá getur bíl­ferð með litlum börnum reynst bæði erfið og ynd­is­leg. Lyk­il­at­riði er að und­ir­búa sig og börnin vel.

Verið leið­sögu­menn barn­anna ykkar. Fyrir ferð­ina er gott að afla sér upp­lýs­inga um merki­lega eða sögu­lega staði á leið­inni svo þið getið sagt börn­unum frá þeim. Setjið markið ekki of hátt hvað varðar dag­leiðir og látið börnin ráða för, þau gætu þurft að teygja oftar úr sér en í upp­hafi var gert ráð fyrir. Nýtið stoppin í smá­hreyf­ingu. Enginn hefur gott af því að sitja of lengi kyrr. Þegar þið farið út úr bílnum hlaupið aðeins um, farið í bolta­leik, sipp­keppni eða stoppið á leik­velli.

Gott nesti
Það getur verið fremur tak­markað úrval af holl­ustu í vega­sjoppum lands­ins og því er snið­ugt að útbúa nesti. Nið­ur­skorið græn­meti og ávextir, rús­ínur og hnetur, sam­lokur, vefjur og jógúrt eru mjög þægi­legar nest­is­lausnir.

Sniðugt er að taka með vatns­brúsa sem þið getið fyllt í stoppum. Það er miklu betra en að reiða sig á safa eða gos­drykki. Reynið að kom­ast hjá því að borða í bílnum, takið frekar stutt hlé á keyrsl­unni. Það er mun meiri hætta á því að það subb­ist niður og ekki er skemmti­legt þegar börn og sæti eru útötuð í ban­ana, kex­mylsnu eða súkkulaði. Fyrir utan hvað það er skemmti­legra að sitja við borð undir berum himni með fal­legt íslenskt lands­lag í bak­runni.

Und­ir­bún­ingur
• Mik­il­vægt er að leyfa börn­unum að taka þátt í und­ir­bún­ingnum. Látið þau til dæmis pakka niður í litla tösku fyrir sig og ekki skipta ykkur af því sem þau taka, jafn­vel þótt þau taki ein­hverja skrýtna hluti með sér.
• Fyrir lengri bíl­ferðir er gott að útbúa sér­staka hirslu fyrir barna­dótið í bílnum eða vagn­inum, til dæmis er hægt að fá slíkar sem hengdar eru aftan á fram­sæti. Þannig er auð­velt að finna dótið og ganga frá því að bíl­ferð lok­inni.
• Merkið bangsa og tusku­dýr vel með far­síma­núm­eri. Það er ekki skemmti­legt að þurfa að keyra til baka og leita að týndum bangsa.
• Ræðið við börnin þannig að þau viti hvað sé vændum, að nú þurfi þau að sitja í bíl í lengri tíma, og spyrjið þau hvernig þau vilji helst hafa ofan af fyrir sér.

Styttum okkur stundir
• Til er fjöld­inn allur af skemmti­legum leikjum sem koma sér vel í bíl­ferðum: Hver er mað­ur­inn? ekki þarf að taka neitt spil með heldur hugsar hver sér fræga mann­eskju og aðrir far­þegar giska á hvern hann hugsar um.
Frúin í Hamborg, klass­ískur leikur sem allir kunna. Einn er spurður hvað hann gerði við pen­ing­inn sem frúin í Hamborg gaf honum en ekki má segja já, nei, svart og hvítt.
Telja bíla­teg­undir eða liti, þá velur ver og einn sér bíla­teg­und eða lit og telur alla bíla af þeirri teg­und sem keyra fram hjá. Þið veljið tíma og þann sem finnur flesta bíl­ana af sinni teg­und vinnur.
Núm­era­plötu­leik­ur­inn, þá giska allir á fyrsta bók­staf­inn á núm­era­plötu á næsta bíl sem keyrir fram hjá. Sá sem giskar á rétt vinnur.
• Syngið með börn­unum.
• Leikja- eða spjald­tölvur geta komið að mjög góðu gagni þegar þol­in­mæðin er á þrotum hjá öllum í bílnum en reynið að halda þeim til haga þangað til.