Þótt þau Saga Ýr Nazari og Bjarki Steinn Pét­urs­son séu ung að árum hafa þau upp­lifað meira en margir sem eldri eru. Þegar þau kynnt­ust fyrir einu og hálfu ári voru þau bæði nýlega orðin edrú eftir margra ára neyslu áfengis og fíkni­efna og stuttu eftir að þau kynnt­ust kom Bjarki út sem trans maður. Í dag eru þau ham­ingju­sam­ari en nokkru sinni fyrr og und­ir­búa nú útkomu fyrsta heftis tíma­rits­ins Góðar fréttir þar sem þau ætla ein­ungis að flytja jákvæðar fréttir, enda segja þau að það skipti miklu máli fyrir vellíðan og and­lega heilsu að leggja áherslu á það jákvæða í líf­inu.

„Það voru aldrei neinir erf­ið­leikar frá minni hlið,“ segir Saga ákveðin. „Ég hef alltaf sam­þykkt Bjarka nákvæm­lega eins og hann er og var ekk­ert hneyksluð á því að hann væri að koma út sem trans maður. Mér fannst aldrei neitt mál að kalla hann Bjarka, þótt hann hafi heitið annað þegar við kynnt­umst. Þetta var mun erf­ið­ara fyrir hann, skilj­an­lega.“

„Já, það hafa poppað upp ýmis verk­efni hjá okkur alveg síðan við kynnt­umst,“ bætir Bjarki við. „Það teng­ist líka því að við erum bæði edrú og þegar við kynnt­umst var ég nýorð­inn edrú og hún búin að vera edrú í eitt ár, þannig að hún þurfti að fylgja mér í gegnum upp­hafið á mínu edrú­ferða­lagi. Það koma upp alls konar verk­efni í edrú­mennsk­unni sem eru krefj­andi, sér­stak­lega í byrjun þegar maður er að læra að vera edrú. Við kynnt­umst rosa­mikið í gegnum það að hjálpa hvort öðru í gegnum erf­ið­leika sem tengd­ust ekki okkar sam­bandi heldur voru mín per­sónu­legu áföll sem hún hjálp­aði mér að takast á við, og ég gerði það sama fyrir hana.“

„Já, við höfum lært það mjög vel í gegnum sam­bandið okkar að við þurfum að taka ábyrgð á okkur sjálf,“ skýtur Saga inn í.

„Ég get ekki bjargað honum og hann getur ekki bjargað mér. Við spegl­uðum mikið hvort annað í því hvað það væri sem hvort okkar um sig þyrfti að taka ábyrgð á. Ég komst að mörgu um sjálfa mig í gegnum þessa speglun og upp­götv­aði að það var ýmis­legt sem ég þurfti að leita mér hjálpar við og hann sömu­leiðis, auð­vitað. Þannig að þetta hefur verið mjög þroskað og heil­brigt sam­band og erf­ið­leikar þýða bara að við þurfum að vera til­búin að horfast í augu við okkur sjálf. Þegar við kynnt­umst vorum við nýbyrjuð að lifa líf­inu á lífs­ins for­sendum; verða full­orðin og vera edrú, vinna úr for­tíð­inni og reyna að láta draumana okkar ræt­ast.“

Talandi um að læra að vera full­orðin, hvað eruð þið gömul? „Ég er tutt­ugu og eins,“ segir Saga. „Og ég varð tutt­ugu og sex ára í júní,“ segir Bjarki, sem kom, eins og áður sagði, út sem trans maður fyrir einu og hálfu ári.

Viðtalið í heild má lesa í nýjasta tölu­blaði Vikunnar.

Tryggðu þér áskrift að Vikunni í vef­verslun

Myndir / Hákon Davíð Björns­son
Förðun / Emil­í­anna Valdi­mars­dóttir, förð­un­ar­fræð­ingur fyrir Urban Decay á Íslandi