Bæjarráð Suðurnesjabæjar er ósátt við að Vinnumálastofnun ætli sér að senda 120 hælisleitendur í bæinn og segja innviðina ekki til staðar til að taka á móti þessum fjölda.
Á bæjarráðsfundi þann 30. ágúst síðastliðinn, ítrekaði bæjarráð Suðurnesjabæjar bókun sína frá því fyrr um sumarið, þar sem lýst var miklum áhyggjum yfir „þessum einhliða áformum ríkisins og lýsir vonbrigðum með að afstaða sveitarfélagsins virðist ekki hafa nein áhrif í því sambandi,“ og átti þá við þau áform Vinnumálastofnunar að senda 120 hælisleitendur í Suðurnesjabæ. Í bókuninni kemur fram að innviðir bæjarins ráði illa við slíkan fjölda, sérstaklega í ljósi þess að bæjarfélagið annast það verkefni að veita forráðalausum börnum sem hingað koma um Keflavíkurflugvöll, skjól og þjónustu, „sem felur í sér mikla áskorun sérstaklega fyrir félagsþjónustu og barnavernd.“
„Sveitarfélagið hefur í raun ekkert vopn í höndunum eða ekkert um þetta að segja,“ sagði Anton Kristinn Antonsson, formaður bæjarráðs, í samtali við Mannlíf. „Vegna þess að þetta er ríkið að semja beint til einkaaðila, sveitarfélagið á ekki húsið.“ Húsið sem hýsa á hælisleitendurna heitir Garðvangur en þar er starfrækt dagdvöl eldri borgara.
„Við höfum bent á að það eru engir innviðir til að taka á móti þessum fjölda,“ sagði Anton og hélt áfram: „Út af því að við erum með gríðarlega stórt og umfangsmikið verkefni í höndunum sem snýr að vegalausum börnum.“ Ástæðan segir Anton vera þá að vegna þess að Flugstöð Leifs Eiríkssonar er á landi Suðurnesjabæjar, falli öll börn sem koma foreldralaus til landsins um flugvöllinn, undir barnavernd bæjarins. „Það er á þeim forsendum sem við erum andvíg þessum áformum Vinnumálastofnunar um að koma með þessa umsækjendur um alþjóðlega vernd, út af því að við höfum ekki inniviði.“
Anton bætti einnig við að í húsnæðinu sem ætlað er að hýsa hælisleitendurna, sé einnig dagdvöl aldraðra til húsa. „Dagdvöl aldraðra er í sama húsi en það er á vegum ríkisins og kostað af því. En við lýstum auðvitað yfir áhyggjum af því líka.“
Hér má sjá bókun bæjarráðsins:
Samskipti við Vinnumálastofnun varðandi áform um búsetu umsækjenda um alþjóðlega vernd í Suðurnesjabæ. Guðrún B Sigurðardóttir sviðsstjóri fjölskyldusviðs sat fundinn undir þessum dagskrárlið.
Í ljósi þess að Vinnumálastofnun hefur tilkynnt að unnið sé að því að koma upp búsetu fyrir umsækjendur um alþjóðlega vernd í Suðurnesjabæ, ítrekar bæjarráð bókun bæjarráðs frá 12. júlí 2023 sem komið var á framfæri við ráðherra og fleiri aðila í stjórnkerfinu. Þar koma m.a. fram áhyggjur bæjarráðs af því að með þessu muni verða miklar áskoranir gagnvart innviðum sveitarfélagsins og að sú þjónusta sem sveitarfélagið heldur úti fyrir íbúana muni ekki standa undir því að fá fjölda umsækjenda um alþjóðlega vernd til búsetu í sveitarfélaginu. Þá benti bæjarráð á að Suðurnesjabær annast það verkefni að veita fylgdarlausum börnum skjól og þjónustu, sem felur í sér mikla áskorun sérstaklega fyrir félagsþjónustu og barnavernd. Bæjarráð ítrekar áhyggjur af þessum einhliða áformum ríkisins og lýsir vonbrigðum með að afstaða sveitarfélagsins virðist ekki hafa nein áhrif í því sambandi.
hælisleitendur
Brottvísun Emmu litlu frestað fram yfir aðgerð
Stjórn Solaris fordæmir fyrirhugaða brottvísun á Emmu og skorar á ráðherra að beita sér
Svarar „viðurstyggilegu“ myndbandi um innflytjendur: „Tölfræðin er augljós uppspuni frá rótum“
Fordæma orð lögreglustjóra á Suðurnesjum: „Glæpavæðir börn á flótta“
Boða til mótmæla gegn útlendingahatri stjórnmálaflokkanna: „Hvenær er nóg komið? Nægur rasismi?“
Athugasemdir