Gunn­hildur Kjerúlf Birg­is­dóttir, frétta­kona á Rík­is­út­varp­inu hefur nú gefið út glæ­nýtt lag, sem ber heitið Alice.

Frétta­kon­unni Gunn­hildi Kjerúlf Birg­is­dóttur er æði margt til lista lagt en lands­menn hafa fengið að njóta frétta­flutn­ings hennar bæði í útvarp­inu og í sjón­varp­inu um dágott skeið en hennar ómþýða rödd og þægi­lega nær­vera á skjánum, hentar starfi hennar afar vel. Ekki vita þó allir að hún er einnig þrusu söng­kona og laga­höf­undur.

Mannlíf ræddi við Gunn­hildi Kjerúlf sem var að gefa út lagið Alice undir lista­manna­nafni sínu Kjerúlf. Samkvæmt henni hefur hún verið að syngja frá því hún man eftir sér en hafi sett tón­list­ina í salt á meðan hún reyndi fyrir sér í blaða­mennsk­unni. „Ég hef verið að syngja svo til frá því ég man eftir mér, sem er auð­vitað mjög týbískt svar, en það hefur alltaf verið hluti af mér að vera síraulandi – hvort sem er á sviði eða utan þess. Ég útskrif­að­ist úr jazz-söng í FÍH og hef sungið í alls konar verk­efnum og hljóm­sveitum í gegnum tíð­ina. Ég fór aðeins að semja mína eigin tón­list á meðan ég var í FÍH, fyrir utan eitt­hvað sem ég bras­aði bara sem ung­lingur. Svo ákvað ég að skella mér í tón­smíðar í Lista­há­skóla Íslands, og útskrif­að­ist með BA-próf þaðan 2020. Þar samdi ég bæði tón­list fyrir sjálfa mig til að syngja, en líka ýmis tón­verk og gerði alls kyns til­raunir, eins og maður reynir að gera í svona námi. Ég setti tón­list­ina samt aðeins í aft­ur­sætið þegar ég fór að reyna fyrir mér í blaða­mennsku.“

Gunn­hildur Kjerúlf.

Mynd: Ólafur Göran Ólafsson Gros

Gunn­hildur segir að hún hafi áður gefið út tón­list með öðrum en að Alice sé fyrsta lagið sem hún gefur undir eigin nafni.

„Þetta er fyrsta sóló-útgáfan mín. Fyrsta skipti sem ég gef út lag bara ein og sjálf, undir eigin nafni. Eða eigin lista­manns­nafni alla­vega. Ég hef áður gefið út tón­list með öðrum og unnið tón­list og hljóð­myndir fyrir leik­verk og slíkt. Eitt verk sem ég gerði rataði í leik­sýn­ingu leik­hóps sem starfar í Banda­ríkj­unum og Noregi. Það verk hefur núna fengið að hljóma í þeirri sýn­ingu í New York og fleiri stöðum í Banda­ríkj­unum, og Noregi. Það er auð­vitað mjög skemmti­legt. “

En um hvað er Alice?

„Ég vil helst leyfa hverjum og einum að túlka tón­list­ina mína eftir eigin höfði. En ég get sagt að það er mik­ill sökn­uður í því. Það fjallar um það sem þú saknar mest, allt sem þú hefðir átt að segja en sagðir ekki. Einhvern horf­inn tíma og hjarta­sár. En hver er Alice? Ég læt það bara liggja á milli hluta. Kveikjan að text­anum var samt gamla og góða Living Next Door to Alice með Smokie. Ég var í ein­hverri stíflu á þessum tíma og heyrði laga­höf­und segja að það virk­aði oft vel til að koma sér af stað að semja texta út frá texta ann­ars lags. Af ein­hverjum ástæðum kom þetta lag strax upp í hug­ann og allt fór að flæða. Mitt lag er auð­vitað gjör­ó­líkt hinu, en þarna kom samt ein­hver hug­mynd. Hvað ger­ist þegar Alice er horfin á braut?“

Gunn­hildur Kjerúlf.

Mynd: Ólafur Göran Ólafsson Gros

Aðspurð hvort stefnan sé tekin á plötu­út­gáfu, svarar Gunn­hildur því ját­andi.

„Já, það er stefnan. Ég lúri á alveg dálít­illi hrúgu af lögum sem ég er að vinna að því að klára og koma saman í plötu.“

Gunn­hildur segir erfitt að svara spurn­ingu Mannlífs um það hverjir hennar áhrifa­valdar eru, enda séu þeir margir.

„Þetta er alltaf svo­lítið erfið spurn­ing. Þeir eru margir og ég hef fengið inn­blástur úr svo mörgum áttum í gegnum tíð­ina. En ég verð að nefna Kate Bush, hún er ein­hvern veg­inn alltaf þarna yfir og allt um kring. Mér líður næstum því eins og ég þekki hana, við höfum verið sam­ferða svo lengi og tón­listin hennar hefur alltaf haft djúp­stæð áhrif á mig. Svo hlusta ég mikið á David Bowie, finnst ég alltaf geta upp­götvað eitt­hvað nýtt í tón­list­inni hans og elska ólíku tíma­bilin. Finnst text­arnir líka ofboðs­lega skemmti­legir. Svo get ég alltaf nefnt Nick Cave. Ekki lítið sem ég hef hlustað á hann í gegnum tíð­ina og bæði lög og textar hreyfa alltaf við mér. Hvílíkur sögu­maður. Það eru auð­vitað margir hér heima líka, en ég verð að nefna Emilíönu Torrini. Tón­listin hennar á sér­stakan stað í hjarta mínu.“

Hér má hlusta á Alice: