For­síðu­við­tal í nýút­komnu tölu­blaði Víns og matar er við Snædísi, þjálf­ara íslenska kokka­lands­liðs­ins.

Snædís Xyza Mae Ocampo matreiðslumaður er þjálfari íslenska kokkalandsliðsins sem Klúbbur matreiðslumeistara heldur utan um og rekur. Hún setti markið strax hátt áður en hún hóf matreiðslunámið. Snædís er yfirmatreiðslumaður á veitingastaðnum Silfru á ION Adventure Hotel á Nesjavöllum. Uppáhaldsmaturinn er steiktur fiskur í raspi með kartöflum og remúlaði.

Snædís Xyza Mae Ocampo fædd­ist á Fil­ipps­eyjum og ólst upp á Dalvík. Hún seg­ist alltaf hafa haft áhuga á list og að vinna með hönd­unum; að skapa eitt­hvað. Hún fór að vinna sem þjónn á sushi-veit­inga­stað á Akureyri með­fram námi í textíl og vöru­hönnun við Verk­mennta­skól­ann á Akureyri og seg­ist ekki hafa fílað að vinna sem þjónn. „Mér fannst það vera erfitt og vildi frekar færa mig inn í eld­hús. Þau þjálf­uðu mig í eld­húsið og að búa til sushi. Mér fannst þetta vera ótrú­lega skemmti­legt en pældi ekk­ert í því að þetta væri eitt­hvað sem mig lang­aði til að gera.“

Tíminn leið og hug­ur­inn leit­aði suður.

„Mig lang­aði til að flytja til Reykja­víkur og hefja nám í fata­tækni í Tækni­skól­anum. Margar vin­konur mínar voru fluttar í bæinn og ég var dálítið að elta þær. Ég kláraði vetr­ar­önn­ina, flutti suður í byrjun jan­úar 2012 og gekk inn á Sushi Social og fékk vinnu í sushi-inu. Ég byrj­aði í nám­inu í Tækni­skól­anum en svo fannst mér svo ótrú­lega gaman að vinna á Sushi Social að ég var farin að skrópa í skól­ann og mæta frekar í vinn­una. Ég fann hvað mér fannst skemmti­legt að vinna í eld­húsi. Yfir­kokk­ur­inn á þeim tíma spurði mig af hverju ég færi ekki að læra kokk­inn þar sem það vant­aði fleiri kokka. Hann var alltaf að hrósa mér fyrir hvað ég væri dug­leg í vinnu. Og þarna eign­að­ist ég vini sem eru vinir mínir enn í dag. Þetta hvatti mig til að end­ur­hugsa hvað ég var að gera. Hvað ég væri að læra.“
Snædís seg­ist hafa ákveðið að taka sér árspásu frá nám­inu og fór til Fil­ipps­eyja þar sem hún hitti ætt­ingja sína og föður sinn en báðir for­eldrar hennar eru frá Fil­ipps­eyjum. Þar var hún í fimm mán­uði. Og hún íhug­aði þar hvað hún vildi gera í fram­tíð­inni.
„Ég ákvað að fara í mat­reiðslu­nám og klára það. Ég hef alltaf verið með keppn­is­skap og stefnan var að verða ein af þeim bestu. Hvernig gerði ég það? Ég var með plan. Hverjir eru bestu kokk­arnir? Og ég ákvað að kom­ast í kokka­lands­liðið. Það var mark­mið mitt alveg frá því ég fór í námið.“
Hún varð fljót­lega einn af aðstoð­ar­mönnum kokka­lands­liðs­ins og var hún einn af aðstoð­ar­mönnum þess á Ólymp­íu­leik­unum árið 2016.

Svava Jóns­dóttir tók við­talið við Snædísi sem lesa má í heild sinni hér: