Sjóarinn brá sér vestur á firði og hitti þar útgerð­ar­mann­inn, fisk­verkand­ann og sjó­mann­inn Þorgils Þor­gils­son á Flateyri sem gerði hlé á flökun til að veita við­tal.

Þorgils keypti bát­inn Eið, sem var 30 tonna snurð­voða­bátur og gekk það vel allt þar til áfallið reið yfir. Snjóflóð féll á höfn­ina á Flateyri í jan­úar 2020 og eyði­lagð­ist báta­floti bæj­ar­ins á einu bretti.

Þorgils: „Það fóru allir bát­arnir. Og ég var þá nýkom­inn með hann [bát­inn innsk. blm.] Ég var að græja hann og var að fara að byrja. Hann var að koma úr slipp frá Stykk­is­hólmi. Var búinn að skvera hann allan upp og við vorum bara að vinna í honum að fara á snurð­voð.“

Reynir: „Og varstu nýbú­inn að vera um borð?“

Þorgils: „Já, við vorum búnir að vera allan dag­inn en þetta ger­ist um ell­efu, hálf tólf um nótt­ina. Raf­magnið fer af um klukkan ell­efu, svona tíu eða ell­efu. Og ég var þá að horfa á ein­hverja bíó­mynd. Ég þarf alltaf að fara um borð þegar það slær út raf­magni og slá því inn aftur af því að það er svona þriggja fasa, það slær ekki inn sjálft þegar raf­mangið kemur. Og ég sé á sjón­varp­inu að ég þurfi að fara um borð og slá inn raf­magn­inu svo það myndi ekki allt frjósa um nótt­ina. En svo ákveð ég að klára fyrst mynd­ina og fara svo um borð. Svo klukkan hálf tólf er ég að labba heiman frá mér til að fara um borð en skil ekki af hverju allt er á floti. Ég var alveg renn­andi blautur. Ég var í stíg­vélum en það var allt á floti. En ég sá alltaf ljós niðri á bryggju, hélt að það væri bíll þarna. En þá var það staur­inn sem hafði farið niður, mastrið.“

Reynir: „Það hefur verið óhugn­an­leg sjón sem hefur mætt þér?“

Þorgils: „Já. Allt farið. Og í því hringir Birkir [Ein­ars­son innsk. blm.] í mig en hann hafði fengið meld­ingu í sím­ann, hann hefur verið með ein­hverjar græjur um borð. Hann spyr mig hvort það sé ekki allt í lagi, hann hafi verið að fá til­kynn­ingu í sím­ann. En ég sá ekki neitt. En ef ég hefði farið hálf­tíma fyrr, ef ég hefði ekki klárað bíó­mynd­ina, þá hefði ég verið um borð að slá inn raf­magn­inu.“

Sjáðu þátt­inn í heild sinni hér.