Blaðamaðurinn Hjálmar Friðriksson á Samstöðinni hefur nú verið sýknaður af stefnu þriggja fjárfesta sem og félags þeirra vegna ummæla í fréttum í tengslum við andlát sextugs Pólverja í bruna á Funahöfða í október í fyrra.
Vilhjálmur H. Vilhjálmsson gætti hagsmuna þeirra Eljumanna; það var hins vegar Gísli Tryggvason er stóð vaktina fyrir Hjálmar Friðriksson í málinu.
Gunnar Smári Egilsson ritstjóri Samstöðvarinnar segir ánægjulegt að „tjáningarfrelsið sé enn varið á Íslandi. Ég hefði viljað að héraðsdómur gengi lengra og neitaði að taka þetta mál fyrir, sem augljóslega var stofnað til af auðugum mönnum til þagga niður í umfjöllun um vond áhrif þeirra á samfélagið.“
Gunnar Smári bætir því við að það sé alltof „mikið tekið fyrir af svona tilhæfulausum málum þar sem yfirgangssamir frekjudallar, sem hafa auðgast af því að arðræna saklaust og veikstætt fólk, ætla að beita því valdi sem peningar búa yfir til að skapa sér einhvern heilagleika í samfélaginu, hefja sig upp yfir annað fólk og gera sig ósnertanlega. Svo þeir geti haldið áfram að eitra samfélagið, veikja og brjóta niður.“
Hann lýkur pistli sínum á þessum orðum:
„Það er spurning hvort ekki hefði átt að dæma þá til að ganga í stuttermabolum í fimmtán ár, merktum SKÍTAPAKK. Samstöðin er svo fátæk að varnir í þessu máli grófu undan möguleikum stöðvarinnar að halda úti fréttavef.“
Athugasemdir