Sigurður G. Guðjónsson, lögmaður, segir Tobbu Marinósdóttur, ritstjóra DV, ekki vera starfi sínu vaxin. Í samtali við Mannlíf segist Tobba nú ekki gefa mikið fyrir þessi ummæli fyrrum eiganda DV og vonar að Sigurður fari að njóta lífsins.
„Ég ætla að vona að Siggi ætli ekki að eyða öllu sumarfríinu sínu í svona væl. Ég segi bara eins og sagt er við börnin mín á leikskóla: Láttu þér ganga vel kæri vinur,“ segir Tobba Marinósdóttir, ritstjóri DV, í samtali við Mannlíf.
„Láttu þér ganga vel kæri vinur.“
Vísar Tobba þar til þeirra orða sem Sigurður G. Guðjónsson, lögmaður og fyrrverandi eigandi DV, lét falla á Facebook fyrr í dag, í tengslum við umræðu um lestur dv.is. Þar segir Sigurður orðrétt: „Já það liggur fyrir að lestur dv.is hefur hrunið hjá Tobbu enda hefur hún engan sans fyrir fréttum eða hvað það er sem fjöldinn les. Það bera forsíðuviðtöl DV með sér síðan hún tók við.“
Ummælin ritar Sigurður við Facebook-færslu fyrrum markaðs- og þróunarstjóra DV, en með henni fylgir mynd sem sýnir að lestur dv.is hefur farið niður á síðustu sautján vikum.
„Siggi er með annað internet en ég ef hann segir lesturinn hafa hrunið milli ára. Allir miðlar fara niður um hásumar en lesturinn milli ára er ekki niður og DV er á blússandi siglingu,“ bendir Tobba á.
Hún segir fyrrum ritstjórn DV hafa staðið sig vel og hefur ekkert nema góða hluti um hana að segja. Með nýjum ritstjóra og ritstjórn fylgi hins vegar nýjar og ferskar áherslur. „Sjálf hef ég alltaf verið umdeild manneskja og ég var ekki ráðin í þessa vinnu af því að ég þyki þægileg heldur af því að ég fer mínar leiðir. Þau voru með sína sýn og ég er með mína. Og ég er stolt af forsíðuviðtölunum mínum. Þau eru alls konar rétt eins og íslenska þjóðin. Þannig að ég ætla bara að halda áfram að gera hlutina eftir mínu höfði,“ segir hún létt í bragði.
Þess má geta að Sigurður keypti DV í fjórða sinn í byrjun september árið 2017, þegar Frjáls fjölmiðlun keypti DV, Pressuna og fleiri fjölmiðla sem voru í eigu Pressusamstæðunnar.
DV og tengdir miðlar runnu undir Torg ehf., sem er einnig eigandi Fréttablaðsins og vefs með sama heiti og Hringbrautar. Samruninn var samþykktur af Samkeppniseftirlitinu 25. mars. Tobba var ráðinn ritstjóri DV 31. mars.
Sjá einnig: Tobba Marinós er nýr ritstjóri DV
viðtöl
Sigrún hans Kibba í Baulu: „Ég er ekki hnakkaskraut, ég er þurrskreyting.“
Elísabet Jökulsdóttir er alsæl með nýtt nýra: „Ég geng hérna í keng“.
Séra Jóna Hrönn: „Ég man eftir mér fara til að standa við litla gröf í kirkjugarðinum“
Simbi var á kafi í undirheimunum en sneri við blaðinu: „Það er leið út úr þessu“
Athugasemdir